Վերաքննիչ քրեական դատարանում Միքայել արքեպիսկոպոս Աջապահյանին դիմավորեցին ծափահարություններով։
«Լա՞վ եք։ Ի՞նչ կա-չկա»,-հարցրեց Սրբազանը ներկաներին։
«Առողջությունն ինչպե՞ս է»,-հարցրին Սրբազանին։ «Հոյակապ, լավ եմ»,-արձագանքեց նա։
Դատարանի դահլիճում լսվում էին «Սըր-բա-զան, Սըր-բա-զան» զուսպ վանկարկումները։
Նախագահող դատավոր Է. Մանասյանն ասաց, որ դատախազները չեն ներկայացել դատարան, նրանք ասել են, որ դատական նիստի օրվա ու ժամի մասին ծանուցագիր չեն ստացել։
Փաստաբան Արա Զոհրաբյանն ասաց՝ նման պայմաններում նիստը չի կարելի շարունակել, նաև խնդրեց, հաջորդ նիստին ավելի մեծ դահլիճ տրամադրել, քանի որ նիստին ներկա լինելու ցանկություն ունեն շատերը։
Այս գործով դատական նիստը հետաձգվեց. հաջորդ դատական նիստը տեղի կունենա հունվարի 13-ին, ժամը 15.00–ին։
Միքայել Սրբազանի պաշտպանների խմբի փաստաբան Մարինե Ֆարմանյանը ասել է, որ Սրբազանը թույլ չի տվել իրենց որևէ տեղ, նաև դատարանում ասել, որ ինքը առողջական խնդիրներ ունի։
Քրեակատարողական բժշկության կենտրոնից առաջարկել են Միքայել Սրբազանին անվճար բուժել ու վիրահատել, սակայն Միքայել արքեպիսկոպոս Աջապահյանը ցանկացել է բուժօգնություն ստանալ «Իզմիրլյան» ԲԿ-ում՝ իր նախընտրած մասնագետի մոտ։
Միքայել Սրբազանին վաղը կտեղափոխեն «Իզմիրլյան» ԲԿ՝ բուժման նպատակով։
