Արևմտյան աղբյուրների հաղորդմամբ՝ որոշ արտաքին ուժեր ծրագրեր ունեն շարունակելու և ուժեղացնելու հարձակումները Հայ առաքելական եկեղեցու վրա։ Այդ արտաքին ուժերը և օտարերկրյա կրոնական կազմակերպությունները նախատեսում են պառակտում սերմանել հայկական եկեղեցում, զավթել եկեղեցական գույքի մեծ մասը, խզել կապերը Սուրբ Էջմիածնի Աթոռի և սփյուռքում գործող հայկական եկեղեցու միջև, կտրել Էջմիածինը արտերկրից եկող նվիրատվություններից։
Նույն աղբյուրների տեղեկություններով՝ այդ օտար ուժերն ու կրոնական կազմակերպությունները մտադիր են խաթարել սփյուռքում գտնվող հայկական եկեղեցու կարգավիճակն ու հեղինակությունը՝ մեղադրելով այն անօրինական կապերի մեջ, և ստիպել, որ այն ենթարկվի օտար կրոնական կազմակերպություններին։ Նույն ճակատագիրն է նախապատրաստվում նաև Հայաստանում գործող եկեղեցու համար։ Ըստ նույն աղբյուրների՝ նախատեսվում է շարունակել ճնշումները Երուսաղեմի հայկական եկեղեցու վրա և ստիպել, որ հայերն աստիճանաբար լքեն այդ քաղաքի Հայկական թաղամասը։ Որոշ հաղորդումներում նույնիսկ խոսվում է հայերին և այլ արևելյան քրիստոնյաներին Մերձավոր Արևելքից դուրս մղելու ծրագրերի մասին։
Այս հաղորդումներից մի քանիսը կարող են չափազանց ծայրահեղ թվալ, սակայն փաստերը վկայում են, որ այդ գործընթացներից որոշներն արդեն իսկ ընթանում են։ Մնում է միայն հուսալ, որ այդ հաղորդագրությունները չափազանցված կլինեն։
Արթուր Խաչիկյան, քաղաքագետ
