Երևանի ընդհանուր իրավասության դատարանի դատավոր Կարեն Ֆարխոյանը ևս 3 ամսով երկարացրեց ՀՅԴ անդամ Գերասիմ Վարդանյանի կալանավորման ժամկետը։
Մեղադրող Արամ Արամյանը պահանջել է անփոփոխ թողնել ՀՅԴ անդամի նկատմամբ ընտրված խափանման միջոց կալանավորումը։
Իսկ պաշտպան Բենիկ Գալստյանը միջնորդել է, որպեսզի Վարդանյանի նկատմամբ կիրառվի ստորագրություն չհեռանալու մասին, ԱԺ պատգամավորների անձնական երաշխավորության, ինչպես նաև գրավով ազատ արձակելու խափանման միջոցներից որևէ մեկը: Որպես գրավի առավելագույն չափ՝ նշել է 3 մլն ՀՀ դրամը:
Բանտից եկել եմ, որ ընկերներիս ասեմ՝ պայքարը շարունակվում է․ դատարանում ասել է Գերասիմ Վարդանյանը:
«Ինձ ճանաչող ցանկացած մարդ, նույնիսկ իմ թշնամիները լավ գիտեն՝ երբեք ոչնչից չեմ խուսափել, ոչինչից չեմ փախչել։ Այն ինչ կատարվում է իմ անձի նկատմամբ ունի քաղաքական ենթատեքստ։ Ես չեմ եկել այստեղ՝ խնդրելու, որ ինձ ազատություն տաք։ Ինձ համար այդ ազատությունը ոչ մի արժեք չունի, իմ ազատությունը, իմ կյանքը պատկանում է մեր երկրին, մեր հայրենիքին։ Կլինեմ բանտում, կլինեմ ազատության մեջ, ուր որ լինեմ՝ պայքարելու եմ մեր պետության, պետականության, արժանապատվության համար։ Իմ գործողություններում միշտ առաջնորդվել եմ Սահմանադրությամբ, օրենքի շրջանակներում, ոչ մեկին չեմ վիրավորել, ոչինչ չեմ պարտադրել, ոչ էլ՝ վնասել եմ ինչ-որ մեկին։ Այստեղ եմ իմ ընկերներին ասելու՝ պայքարը շարունակվում է»,- ասաց Գերասիմ Վարդանյանը։
Հիշեցնենք, որ քրեական գործը վերաբերում է 2020թ նոյեմբերի 9-ին կապիտուլյացիոն ակտի ստորագրմանը հաջորդած ակցիաներին, մասնավորապես՝ «Ազատություն» ՌԿ շենք մուտք գործելու դրվագին։ Գերասիմ Վարդանյանը, Բագրատ Եսայանը, Գառնիկ Մելքումյանը մեղադրվում են 2020 թվականի նոյեմբերի 10-ին Երևան քաղաքում տեղի ունեցած զանգվածային անկարգությունների ժամանակ խոչընդոտները վերացնելու եղանակով զանգվածային անկարգություններին օժանդակելու, ինչպես նաև խմբի կազմում լրագրողի մասնագիտական օրինական գործունեությանը խոչընդոտելու մեջ: Քրեական գործով կալանավորված է միայն Գերասիմ Վարդանյանը, ընդ որում, նրան կալանավորելու առաջին փորձը եղել է դեռևս 2020թ, սակայն դատարանները մերժել են կալանքի միջնորդությունները՝ հիմնավոր կասկածի բացակայության հիմքով։
Քրեական գործի մասին ԱԱԾ-ն երկու տարի անց է հիշել, քննիչը փոխել է Վարդանյանի մեղադրանքը և կրկին կալանավորելու միջնորդություն ներկայացրել դատարան, որն այս անգամ բավարարվել է՝ դատավոր Դավիթ Արղամանյանի կողմից՝ կալանավորման չորրորդ փորձից։ Ընդ որում, դատավոր Արղամանյանի կողմից կայացված որոշման դեմ բողոք է ներկայացվել, որը առ այս պահը չի քննվել Վերաքննիչ քրեական դատարանում։
