«Վերջին շաբաթվա ընթացքում դոլարի նկատմամբ պահանջարկը կրկնապատկվել է, գումար ունեցողներն իրենց ակտիվները վերածում են դոլարի, ըստ երույթին, երկրից հանելու համար»,- Azg.am-ի հետ զրույցում մեկնաբանելով այս օերերին դոլարի փոխարժեքի սրընթաց բարձրացումն ու դրամի արժեզրկումը՝ ասում է տնտեսագետ Սուրեն Պարսյանը։
Նա նկատել է, որ արդեն իսկ գրանցվում է կապիտալի արտահոսք երկրից, միաժամանակ կրճատվել է դրսից եկող գումարների հոսքը։
«Այս պահին Կենտրոնական բանկը չի միջամտում, բայց իր տրամադրության տակ եղած միջազգային պահուստները, որոնք մոտ 4․2 մլրդ դոլար են, կարող են ներարկվել տնտեսության մեջ՝ զսպելով դրամի արժեզրկում»,- նշում է մեր զրուցակիցը։
Նկատենք, որ երեկվա՝ հոկտեմբերի 3-ի համեմատ՝ այսօր արդեն դոլարի փոխարժեքը էականորեն՝ մոտ 20 դրամ, նվազել էր։ Ոլորտի մասնագետներն ԱՄՆ դոլարի փոխարժեքի կտրուկ աճը կապում են Արցախում տեղի ունեցած իրադարձությունների՝ երկօրյա պատերազմի ու բռնի տեղահանության հետ։
Նախ՝ Արցախից Հայաստան տեղահանվածների մոտ նույնպես դրամ է, եւ, բնական է, դրամի մեծ շրջանառությունն ինչ-որ չափով ազդել է դրա «թանկանալու» վրա։
Բացի այդ՝ ոչ միայն Արցախից տեղահանվածները, այլեւ Հայաստանում ապրողները, Արցախի կապիտուլյացիայի ու Ադրբեջանի՝ արցախահայության նկատմամբ իրականացրած ցեղասպանությունից հետո, ներքնակների տակ պահած վերջին դրամները հանում եւ դոլար են դարձնում։ Երկրի ներսում անպաշտպան ու ոչ անվտանգ լինելու զգացումը մարդկանց կարոող է ստիպել (գուցե ձմեռվանից հետո), լքել Հայաստանն ու օտար ափերում բախտ որոնել։
Իհարկե, Հայաստանից առաջինը մեկնելու են Արցախի բոլոր այն պաշտոնյաններն ու գործարարները, որ այս ընթացքում հասցրել են այլ երկրներում կապեր փնտրել ու ստեղծել։ Հիմա Արցախից բերած կապիտալը դոլարի են վերածում, կարճ ժամանակով Հայաստանի բանկերին պահ տալիս, որ մի քանի ամսից վերցնեն ու գնան երկրից։
Սեւակ Վարդումյան
