Ադրբեջանի նախագահ Իլհամ Ալիևի աշխատակազմն Արցախի Հանրապետության ներկայացուցիչներին հրավիրել է Բաքու՝ հանդիպման։
ԱՊԱ գործակալությունը հաղորդում է, որ Ադրբեջանն առաջարկում է երկրորդ հանդիպմանը քննարկել Արցախի վերաինտեգրման, ենթակառուցվածքային ծրագրերի հարցերը։ Ադրբեջանի նախագահի՝ անվտանգության հարցերով օգնական Հիքմեթ Հաջիևը երեկ հայտարարել է, որ Բաքուն անընդունելի է համարում խաղաղության համաձայնագրում Արցախի վերաբերյալ որևէ կետ ներառելը։ Նրա խոսքով՝ Ադրբեջանի նախագահը բազմիցս է հայտարարել, որ Երևանի և Բաքվի միջև խաղաղության պայմանագրի հետ կապված հարցերը պետք է առանձին լուծվեն և «կապված չլինեն Ղարաբաղի բնակչությանը վերաբերող հարցերին»։
«Ղարաբաղի հայերի իրավունքների և անվտանգության հարցը զուտ Ադրբեջանի ներքին խնդիրն է, և Բաքուն չի պատրաստվում իր ներքին որոշումներին վերաբերող հարցերը քննարկել մի 3-րդ կողմի հետ։
Ղարաբաղի հայերի իրավունքների ու անվտանգության հարցերը միայն Ադրբեջանի Սահմանադրությանը և օրենքներին համապատասխան պետք է լուծվեն»,- հայտնել է Հաջիևը։
