Ադրբեջանը սկսել է ակտիվորեն քարոզել «Զանգեզուրի միջանցքի» «անհրաժեշտությունը» հենց Հայաստանի համար։
Մեր թշնամի պետության ղեկավարը, ստացվում է, գիշեր-ցերեկ «մեր մասին է մտածում», ուզում է, որ Հայաստանի շահերը պաշտպանվեն, մեր երկիրը տնտեսական ու քաղաքական նպաստավոր իրավիճակում հայտնվի։ Դրա համար համոզում-քարոզում է, որ Հայաստանն էլ «իր շահերը գիտակցի ու բացի «Զանգեզուրի միջանցքը»։
Եթե Հայաստանը շարունակի խոչընդոտել Զանգեզուրի միջանցքի բացման հետ կապված գործընթացը, նրա՝ երբևէ տարանցիկ երկիր դառնալու հնարավորությունները գրեթե զրոյի կհավասարվեն. հայտարարել է Ալիևը։
«Ցավոք, վերջին հինգ տարիների ընթացքում հայկական կողմից որևէ աշխատանք՝ կապված Զանգեզուրի միջանցքի հետ, չի իրականացվել: Այս հարցը միտումնավոր հանվում է օրակարգից: Այս դեպքում, Հայաստանի՝ երբևէ տարանցիկ երկիր դառնալու հնարավորությունները մոտենում են զրոյի:
Եթե նրանք շարունակեն խոչընդոտել այս գործընթացը, կարծում եմ, կհայտնվեն ոչ միայն տրանսպորտային մեկուսացման մեջ, ինչում նրանք այսօր կան, այլև որոշակի չափով քաղաքական մեկուսացման մեջ», – նշել է նա։
