Ադրբեջանի նախագահը վերջին շրջանում հաճախ էր մեղադրում Հայաստանին զորքն Արցախից դուրս չբերելու համար, ու սա ամեն անգամ հնչում էր որպես պահանջ:
Գործադրի՝ օգոստոսի 4-ի նիստին վարչապետ Փաշինյանը պաշտոնապես հայտարարեց՝ Լեռնային Ղարաբաղում ՀՀ զինծառայող չկա: Այսինքն՝ հրահանգը կատարված է: Փաշինյանի կարծիքով, Ալիեւը հենց այս հարցերն է օգտագործում էսկալացիա հրահրելու համար: Այստեղ տրամաբանորեն կարող է մտավախություն առաջանալ. Ալիեւը նաեւ «Զանգեզուրի միջանցքն» է պահանջում, եւ չի բացառվում, որ գործադրի առաջիկա նիստերից մեկի ժամանակ Փաշինյանը ձայնի նույն առոգանությամբ ու դարձյալ պաշտոնապես հայտարարի՝ Զանգեզուրի միջանցքը բացված է:
Նա այսօր ավելի հեռուն գնաց: Բացի այն, որ պարզ հասկացրեց՝ Արցախն անպաշտպան է՝ գոնե այնքանով, որքանով այն ապահովում էին Հայաստանից Արցախ զորակոչված զինծառայողները, նաեւ չբացառեց Պաշտպանության բանակի զինվորների ետ քաշումը շփման գծից, եթե ռուս խաղաղապահները ամբողջապես երաշխավորեն շփման գծի անձեռնմխելիությունը:
