Կառավարության ծրագրում առանձին թիրախ է դրված, որ տարածաշրջանային լեզուների ուսուցումը խրախուսենք մեր դպրոցներում, լրագրողների հետ ճեպազրույցում այսօր ասաց ԿԳՄՍ նախարար Ժաննա Անդրեասյանը։
Նա հիշեցրեց, որ 400 դպրոց ցանկություն է հայտնել ուսուցանել տարածաշրջանային այս կամ այն լեզուն՝ մեծամասամբ թուրքերեն։
«Մենք ունեցանք կադրերի լուրջ խնդիր, և շուրջ երեք տասնյակ դպրոցներ է, որ կարողացան տարածաշրջանային լեզուների ուսուցանում իրականացնել։ Ավելի ակտիվ է, իհարկե, պարսկերենը՝ շնորհիվ դեսպանատան հետ համատեղ աշխատանքի։ Երեքական դպրոց ունենք վրացերենով և ադրբեջաներենով։ Մենք ապրում ենք այս տարածաշրջանում, և լեզուների ուսուցանումը նաև միջոց է ճանաչելու մեր տարածաշրջանը»,- ասաց նախարարը՝ միաժամանակ ցավ հայտնելով, որ տարածաշրջանային լեզուների ուսուցանումն դիտարկվում է Թուրքիայի ազդեցության հնարավոր մեծացման համատեքստում։
Անդրադառնալով Մանկավարժական համալսարանի ռեկտորի ժամանակավոր պաշտոնակատարի թեմային՝ Ժաննա Անդրեասյանը նշեց՝ վերջինս իրավիճակի վերլուծության փուլում է, տարբեր հարցեր է դիտարկում, այսօր համատեղ քննարկում ունեն։
«Մի քանի օր է, որ ժ/պ-ն աշխատում է, մեղադրյալի կարգավիճակ ունեցողների գործունեությունը կասեցված է»,- ասաց Անդրեասյանը։
