Ես առհասարակ քաղաքական թիմի վարչության անդամ եմ և բոլոր քաղաքական նախաձեռնություններին միանալու եմ, լրագրողների հետ զրույցում ասաց Երևանի փոխքաղաքապետ Արմեն Փամբուխչյանը՝ անդրադառնալով հարցին՝ արդյոք կմիանա հանձնախմբին, որը Փաշինյանը կոչ է արել ստեղծել՝ Վեհափառին հեռացնելու համար:
Փամբուխչյանը նշեց, որ իրենք հարցադրում են արել՝ Կաթողիկոսն ունի արդյոք երեխա, թե՝ ոչ, այդ հարցին պատասխան չեն ստացել, այդտեղից կարող են ենթադրել, որ այո՛, ունի։
«Հերքում չենք ստացել և, ըստ կանոնագրքի, նա իրավունք չունի լինել Կաթողիկոս: Իհարկե, մենք Տեր Աստված չենք, գիրք կա գրած, կանոնագիրք կա եկեղեցու, և նա է որոշում: Մեզ ինչո՞ւ եք տարանջատում, առհասարակ մարդկանց տարանջատում եկեղեցուց»,- հարց հնչեցրեց փոխքաղաքապետը:
Փամբուխչյանն իր հերթին հարց ուղղեց լրագրողներին:
«Հարգելի՛ գործընկերներ, ես որպես ավագանու անդամ ենթադրյալ իրավունք չունեմ լինեմ երկքաղաքացի կամ վերջին վեց ամսում Երևանի գրանցում պետք է ունենամ։ Հիմա, եթե օրերից մի օր պարզվի, որ ես երկքաղաքացի եմ և կամ այդ ժամանակ 2023 թվականին, որ գրանցվել եմ որպես Երևանի ավագանու անդամ, չեմ ունեցել վեց ամսվա գրանցում Երևանում, ձեր արձագանքը ինչպիսի՞ն կլինի: Այսինքն՝ ես պետք է այդ պահից սկսած՝ դադարեցնեմ լիազորություններս, ճի՞շտ է»,- ասաց նա:
Դիտարկմանը՝ Փաշինյանն ասում է՝ Հայ Առաքելական եկեղեցու հավատավոր զավակ է, բայց իշխանությունը մոռանում է, թե քանի եկեղեցի եք թողել Արցախում, նա ասաց.
«Այդ հին խոսակցություններն արդեն ինձ թվում է՝ էլ ակտուալ չեն, շատ ակտուալ չեն, որովհետև մենք չենք թողել: Այդ մասին մենք խոսել ենք, հազար անգամ խոսել ենք, և այս ձեր ասածները, թե թողել եք, չգիտեմ՝ ինչ եք արել, դա չի համապատասխանում իրականությանը»:
Դիտարկմանն էլ, որ ՔՊ-ի ծրագրում գրած է եղել Արցախի մասին, և հիմա իշխանությանը մեղադրում են կառավարության ծրագիրը խախտելու մեջ, պետք է հեռանան, Փամբուխչյանը պատասխանեց.
«Այդ հարցը Ազգային ժողովում քննարկվել է, մենք ապացուցում ենք, որ մենք չենք խախտել»:
