Ես լիակատար կիսում եմ վարչապետի բոլոր հայտարարությունները։ Ենթադրում եմ՝ Վեհափառի ընտրության հարցում պետության՝ վճռորոշ մասնակցության հարցը պետք է լինի օրենսդրության ճանապարհով, լրագրողների հետ ճեպազրույցում այսօր այս մասին ասաց ԱԺ նախագահ Ալեն Սիմոնյանը։
Հարցին՝ հնարավո՞ր է առաջիկայում սահմանադրական համապատասխան փոփոխություն լինի, ԱԺ նախագահը պատասխանեց.
«Ես նման քննարկամն չեմ մասնակցել, բայց չեմ բացառում, որ եթե Սահմանադրության մեջ նման փոփոխություն լինի, այդ հարցն այլ ձև է ներկայացված լինելու։ Որովհետև Հայաստանը խղճի ազատություն դավանող երկիր է, և եթե կրոնական կառույցը պետք է ունենա հատուկ կարգավիճակ, դա նշանակում է, որ պետությունը նույնպես դրա մեջ պետք է ունենա մասնակցություն՝ առնվազն այդ կառույցը թափանցիկ դարձնելու համար։ Վեհափառի ընտրության մեջ մասնակցությունը ևս չեմ բացառում»,- ասաց Սիմոնյանը։
Ըստ ԱԺ նախագահի՝ հոգևորականները մոռացել են, որ ծառա են։
«Մտածում են, որ գողական են, հարց լուծող, քավոր, բիզնեսմեն են։ Սրբազան կար՝ մինչև էս վերջերս զենքով էր ման գալիս։ Կճոյանի հետ անձնապես ես հարաբերություններ չունեմ։
Մի հատ պետք է հասկանանք՝ եկեղեցին եկեղեցի՞ է, եկեղեցականները եկեղեցականնե՞ր են։ Կարծում եմ՝ պետք է կոնկրետ պատասխան լինի, որ չգնանք Լեոյի փողոցի վրա ինչ-որ ապտեկաներ փնտրենք, ասենք՝ ո՞ւմ ապտեկան ա։
Եթե մենք ցանկություն հայտնեինք, մեզ այսօր քննադատող հոգևորակաները մեծ հաճույքով կդառնային մեր խոսնակները»,- հավաստիացրեց Սիմոնյանը։
Հարցին՝ իշխանությունները կաթողիկոսի սեփական թեկնածու ունեն, ԱԺ նախագահը պատասխանեց՝ դրա մասին չի մտածել, սակայն մամուլից տեղյակ է, որ Բագրատ սրբազանը Ռոբերտ Քոչարյանի հետ հանդիպման ժամանակ սեփական թեկնածությունն է առաջարկել՝ խնդրելով սատարել իրեն։
