Այս պահին կառավարության շենքի առջև ընթանում է արցախցիները բողոքի ակցիան և նստացույցը: Պատճառը հունիսից դադարեցված բնակության վարձի աջակցության ծրագիրն է:
Նշենք, որ կառավարության ներկայացուցիչն ակցիայի մասնակիցներին առաջարկեց կառավարությունում հանդիպեն փոխվարչապետ Տիգրան Խաչատրյանի հետ:
Ինչպես լրագրողների հետ զրույցում նշեց Արցախի ՄԻՊ Գեղամ Ստեփանյանը, այդ հանդիպումներն անարդյունավետ են, քանի որ բնակարանային վարձի աջակցության հարցը, միևնույն է, չի լուծվում։
«Այդ հարցը, միևնույնն է, չի լուծվում, իրենք մնում են իրենց կարծիքին։ Հիմա լավ, եթե նորից բարձրացանք նույն բանը ասեն, ի՞նչ օգուտ կլինի»,- ասաց նա:
«Արցախցիների իրավունքների պաշտպանության» խորհրդի անդամ Ապրես Մարգարյանն էլ նշեց, որ իրենք հանդիպմանը դեմ չեն, բայց ցանկալի է՝ համապատասխան անձն իջնի ներքև և խոսի հավաքվածների հետ։
Ըստ Գեղամ Ստեփանյանի՝ արցախցիների դիրքորոշումը հետևյալն է եղել՝ քանի դեռ տվյալ անձի, ընտանիքի, մշտական բնակության հարցը չի կարգավորվել, այդ ընտանիքը պետք է ստանա այդ սոցիալական աջակցությունը։
«Լավ, երկու ամսով ավելացրեցին, հիմա երկու ամսից նորից պետք է գանք այստեղ կանգնե՞նք։ Սա խեղկատակություն չէ՞: Մինչև վերջ ասվածն այն է՝ մինչև որ այդ անձը բավարար կենսապայմաններով ապահովված լինի, դրսում չմնա»։
Գեղամ Ստեփանյանը միաժամանակ ընդգծեց՝ իրենք երբևէ որևէ քննարկումից, հանդիպումից չեն խուսափել, հակառակը՝ միշտ պատրաստակամ գնացել են։
«Բայց ժողովուրդ, եթե խոսում ես ու խոսակիցդ քո ասածը չի հասկանում, էլ ի՞նչ խոսես։ Հերթական անարդյունավետ հանդիպումն է լինելու, չգիտեմ, եթե այլ կարծիքներ կլինեն, քննարկենք, կհասկանանք: Հիմա իջել են այս առաջարկն արել, պետք է հասկանանք՝ ինչ ենք անում»,- ասաց Ստեփանյանը:
Ապրես Մարգարյանն էլ առաջարկեց ակցիան ինչպես պլանավորել են, սկսեն, այդ ընթացքում արդեն իրենց դիրքորոշումն էլ կհստակեցվի:
Հիշեցնենք, որ երեկվա հանրահավաքից հետո «Արցախցիների իրավունքների պաշտպանության խորհուրդը» որոշել էր Ազատության հրապարակից տեղափոխվել կառավարության շենքի դիմաց։
Հանրահավաքում ելույթ ունեցողներն անդրադարձել էին արցախցիների սոցիալական հարցերին, մասնավորապես բնակապահովման ծրագրին, Բաքվումգտնվող հայ գերիների վերադարձին, ինչպես նաևԱրցախում գտնվող պատմամշակութային ժառանգության պահպանմանը։
