Հայաստանը կոչ է անում ՄԱԿ-ի կառույցներին փաստահավաք առաքելություն ուղարկել Արցախ՝ տեղում ստեղծված իրավիճակին ծանոթանալու համար։ Դեկտեմբերի 21-ի գիշերը Նյու Յորքում պաշտոնական Երևանի պահանջով հրավիրված ՄԱԿ-ի Անվտանգության խորհրդի նիստին հայտարարեց Հայաստանի մշտական ներկայացուցիչ Մհեր Մարգարյանը։
«Ստեղծված իրավիճակում մենք կոչ ենք անում ՄԱԿ-ի Անվտանգության խորհրդին քայլեր ձեռնարկել՝ պահանջելով, որպեսզի Ադրբեջանը լիարժեք հարգանք ցուցաբերի 2020 թվականի նոյեմբերի 9-ի եռակողմ հայտարարության դրույթների հանդեպ և անմիջապես ու առանց նախապայմանների ապաշրջափակի Լաչինի միջանցքը՝ վերացնելով անվտանգ և անարգել տրանսպորտային երթևեկության բոլոր խոչընդոտները։ Կոչ ենք անում նաև փաստահավաք առաքելություն ուղարկել Լաչինի միջանցք և Լեռնային Ղարաբաղ՝ տեղում ստեղծված հումանիտար կացությունը գնահատելու և ՄԱԿ-ի մարդասիրական կառույցների անարգել մուտքը ապահովելու համար», – հայտարարեց ՄԱԿ-ում Հայաստանի մշտական ներկայացուցիչը։
ՄԱԿ-ում Ադրբեջանի դեսպան Յաշար Ալիևը հայտարարեց, թե Լաչինի միջանցքը որևէ մեկը չի արգելափակել։
Նա հակադարձեց Մհեր Մարգարյանին՝ Արցախն անվանելով Ադրբեջանի Ղարաբաղի տարածաշրջան և խոսքը տանելով «բնապահպանական» դաշտ. «Ըստ ամենայնի՝ Հայաստանին և որոշ երրորդ պետություններին տեղում արձանագրվող այս դրական զարգացումները գնալով ավելի ու ավելի են մտահոգում, ուստի նրանք դիմում են ամեն տեսակի սադրանքների՝ լարվածություն ստեղծելու և կարգավորման փխրուն գործընթացը խափանելու նպատակով։ Ադրբեջանի բնական պաշարների անօրինական շահագործման մեջ ուղղակիորեն ներքաշված և տարածաշրջանի հետ որևէ կապ չունեցող տխրահռչակ գործարար Ռուբեն Վարդանյանի՝ Ադրբեջանի Ղարաբաղի տարածաշրջանում ի հայտ գալը, ինչպես նաև որոշ արտաքին դերակատարների ապակայունացնող գործողությունները այս ամենի վառ վկայությունն են»։
Յաշար Ալիևը մեկ անգամ ևս պնդեց, որ Լեռնային Ղարաբաղ անվանումով տարածաշրջան գոյություն չունի։ Նրա պնդմամբ՝ Բաքուն արդեն իսկ ուղղակի շփումների մեջ է տեղի հայության հետ։ Որպես «հաջողված շփումների» օրինակ՝ ադրբեջանցի դիվանագետը խոսեց Լաչինի նոր ճանապարհի կառուցման ու ադրբեջանցի մասնագետների՝ Սարսանգի ջրամբար այցելելու մասին։
