Իրանի ԶՈՒ ցամաքային զորքերի հրամանատար, գեներալ Կիոմարս Հեյդարին այսօր Ադրբեջանի հետ սահմանին մեկնարկած «Խայբարի նվաճողներ» զորավարժություններից առաջ հայտարարել է, որ թույլ չեն տալու տարածաշրջանում սահմանային փոփոխություններ։
«Իրանի համար անթույլատրելի է տարածաշրջանի երկրների պետական սահմանների փոփոխությունը։ Բոլոր օրինական սահմանները պետք է պահպանվեն։ Մի երկրի թուլությունն իր սահմանների պաշտպանության հարցում չի նշանակում, որ մեկ այլ երկիր պետք է սահմանը հատի օտարերկրյա օգնությամբ։ Իրանը դա թույլ չի տա։ Նախկինում այս տարածաշրջանում պատերազմ էր, բայց հիմա ժամանակն է անվտանգության և վերականգնման համար»։
Իրանց գեներալը հայտնել է որ երկրի պատմությունը, վերաբերմունքն տարածաշրջանի ու հարևանների նկատմամբ կայունության և անվտանգության հրաշալի ապացույց է։
«Ադրբեջանից Իրան, այնտեղից Թուրքիա կամ Նախիջեւան, Իրանից Ադրբեջան, Հայաստան բեռնափոխադրումները պետք է իրականացվեն լիակատար անվտանգության և խաղաղության պայմաններում, երկրները պետք է կատարեն իրենց պարտավորությունները և հարգեն էներգակիրների անվտանգությունը, տնտեսական երթուղիները և տարանցումը»։
Ինչպես հաղորդում Է Tasnim-ը, Հեյդարին նշել է նաև, որ զորավարժություններն առանձնահատուկ նրբություն ունեն, ուղղված են տարածաշրջանի երկրներում սիոնիստական ռեժիմի և ԻՊ-ի ահաբեկիչների թաքնված եւ բաց ներկայությանը։
«Ահաբեկիչները տարածաշրջան են ժամանել հայ-ադրբեջանական պատերազմի ժամանակ ՝ տարածաշրջանի երկրներից մեկի հրավերով։ Մենք վստահ չենք, որ նրանք լքել են տարածաշրջանը, այդ զորավարժությունները ազդանշան են ուղարկում նրանց։ Սիոնիստները պետք է իմանան, որ տարածաշրջանում տեղ չունեն։ Իրանի բանակը շատ զգայուն է նրանց նկատմամբ՝ որտեղ էլ տեսնի նրանց, նա կռվելու է նրանց դեմ»։
Հիշեցնենք, որ նախօրեին Իրանի ԱԳ նախարար Ամիր Աբդոլլահիանը Թեհրանում Ադրբեջանի դեսպանի հետ հանդիպման ժամանակ դժգոհություն էր հայտնել Արաքս գետի հյուսիսային ուղղությամբ սիոնիստների ներկայության կապակցությամբ:
Ավելի վաղ հայտնել էինք, որ Իրանի Իսլամական Հանրապետության զինված ուժերը այսօր զորավարժություններ կանցկացնեն երկրի հյուսիսարևմտյան շրջանում ՝ Ադրբեջանի հետ սահմանի մոտ: Զորավարժությունների անվանումն է «Խայբարի նվաճողներ»: Դրա նպատակն է բարելավել առկա մարտունակությունը և բարձրացնել արդյունավետությունը:
Զորավարժությունները ներառելու են հրետանի, զրահատեխնիկա, անօդաչու թռչող սարքեր և ուղղաթիռներ:
Աղբյուր` Փաստինֆո
