Իսրայելի անվտանգության ծառայությունները քննարկում են Իրանի հնարավոր պատասխանը՝ կապված իրանական թիրախների վրա վերջերս իրականացված գրոհների հետ:
Նշվում է, որ ըստ Kan հանրային հեռարձակողի՝ անվտանգության ուժերը երկուշաբթի օրը քննարկումներ են անցկացրել՝ փորձելով կանխատեսել, թե «երբ և ինչպես Իրանը կպատասխանի վերջին 48 ժամվա ընթացքում Սիրիայում Իրանի աջակցությունը վայելող աշխարհազորայինների ավտոշարասյուների վրա իրականացված ավիահարվածներին»:
Այդ ավիահարվածներին նախորդել էր ԱԹՍ-ներով հարձակումը Սպահան քաղաքում գտնվող զինամթերքի պահեստի վրա: Նշվում է, որ Իսրայելի ներսում տարբեր թիրախների դեմ հնարավոր պատասխան հարձակումներից բացի՝ անվտանգության ուժերը նաև չեն բացառում, որ «Իսլամական Հանրապետությունը կարող է թիրախավորել իսրայելցի զբոսաշրջիկներին, պաշտոնատար անձանց և արտասահմանում գտնվող դեսպանատները»։
Իսրայելը ձեռնպահ է մնում Սպահանում տեղի ունեցած հարձակման վերաբերյալ մեկնաբանություններից։ Երկուշաբթի օրը Իրանն սպառնացել է պատասխան գործողություններով՝ զգուշացնելով Իսրայելին, որ «պետք չԷ կրակի հետ խաղալ»։
Իրանցի պաշտոնյան, որի անունը չի հրապարակվում, Al Jazeera-ին հայտնել է, որ հարձակման հետևում, ամենայն հավանականությամբ, կանգնած է Իսրայելը, և Թեհրանը կձգտի վրեժ լուծել:
«Իսրայելը լավ գիտի, որ պատասխան է ստանալու, ինչպես եղել Է անցյալում: Նրանք, ովքեր կրակի հետ են խաղում, առաջինը կայրվեն, եթե որոշեն տարածաշրջանային պատերազմ սկսել», – ասել Է լրատվամիջոցի աղբյուրը:
