Թուրքիայում տեղի ունեցած ՏԻՄ ընտրություններում իշխող «Արդարություն և զարգացում» կուսակցությունը ընդհանուր ձայների քանակով զիջել է ընդդիմադիր Հանրապետական-ժողովրդական կուսակցությանը՝ զբաղեցնելով երկրորդ տեղը. նկատում է քաղաքագետ Վարդան Բալյանը։
Իրականում, սակայն, հեռացող Էրդողանի քաղաքական ուժի էլեկտորալ արդյունքները շատ ավելի վատն են ու միանշանակ պարտություն են նշանակում: 973 շրջաններից ամենաշատում՝ 356-ում հաղթանակ տոնելով՝ 81 նահանգներից միայն 24-ում են քաղաքապետեր ու ՏԻՄ ղեկավարներ ընտրվել Էրդողանի թիմակիցները:
35 նահանգներում իշխանության գլուխ են կանգնել Հանրապետական-ժողովրդական, 10-ում Ժողովրդական հավասարության և դեմոկրատիայի, 8-ում՝ «Ազգայնական շարժում» կուսակցությունների ներկայացուցիչները: 12 ամենախոշոր քաղաքներից 8-ում, այդ թվում՝ Ստամբուլ, Անկարա, Իզմիր, հաղթել են հանրապետականները, ընդամենը 3-ում՝ բնակչության թվով մեծությամբ 6-րդ Ղազիանթեփ, 7-րդ Կոնյա և 9-դ Կայսերի քաղաքներում՝ էրդողանականները, մեծությամբ 12-րդ Դիյարբեքիրում քրդական Ժողովրդական հավասարության և դեմոկրատիա կուսակցության թեկնածուները:
«Թուրքական ընտրությունների արդյունքները մեզ համար, որքան էլ տարօրինակ է հնչում առաջին հայացքից, կարևոր են անվտանգային ու արտաքին քաղաքական տեսակետից: Կարծում եմ, կարիք կա, որ փորձագիտական հանրույթը և պետական համապատասխան մարմինները մանրակրկիտ վերլուծեն տեղի ունեցածը»,- նշել է քաղաքագետը։
