Թուրքիայի Սահմանադրական դատարանն անօրինական է ճանաչել Սամանդաղի շրջանի հայկական եկեղեցու ունեցվածքը պետությանը հանձնելու որոշումը։
Ստամբուլում լույս տեսնող հայկական «Ակոս» թերթին տված հարցազրույցում Թուրքիայի միակ հայկական գյուղի՝ Վաքըֆլի եկեղեցու հոգաբարձուների խորհրդի նախագահ Ջեմ Չափարը նշել է, որ իրենք մեծ ուրախությամբ են ընդունել Սահմանադրական դատարանի որոշումը, քանի որ այն վերաբերում է ոչ միայն եկեղեցուն պատկանող, այլեւ Մուսա լեռան հայկական գյուղերի մի շարք կալվածքների վերադարձին։
Նա ընդգծել է, որ Սահմանադրական դատարանի որոշման հիման վրա սկսվում է 27 կալվածքների վերադարձի դատավարությունը։
Լուսանկարում պատկերված է Մուսա լեռան հայկական մշակույթի թանգարանը, որը բացվել է 2020 թվականի հունիսի 8-ին Հաթայ նահանգի Սամանդաղի շրջանի Վաքըֆլ միակ հայկական բնակավայրում։
