Մայիսի 14-ին Թուրքիայում նախագահական և խորհրդարանական համատեղ ընտրություններն են:
Ելնելով այս հանգամանքից, նաև նախընտրական քարոզարշավից` Թուրքիայի ազգային մեծ ժողովը՝ Մեջլիսը, հարկադիր արձակուրդի էր գնացել: Բայց որ այն բացվել էր 1920 թ. ապրիլի 23-ին, ընդ որում՝ անձամբ Մուստաֆա Քեմալի (այն ժամանակ դեռ Աթաթուրք չէր կոչվում, նա այդ ազգանունը ստացել է 1934 թ. նոյեմբերի 24-ին) ելույթով, ավելին՝ վերջինը երկրում հանրապետական կարգերի հռչակումից (1923 թ. հոկտեմբերի 29-ին) ապրիլի 23-ը՝ որպես տոն, նվիրել է թուրք երեխաներին, ուստի այդ օրվա առթիվ Մեջլիսում հրավիրվել է հանդիսավոր նիստ: Ելույթ են ունեցել Մեջլիսի նախագահ Մուստաֆա Շենթոփը և տարբեր կուսակցությանների ներկայացուցիչներ:
Նախագահ Էրդողանը նիստին չէր մասնակցում, հետևաբար, նրա «Արդարություն և բարգավաճում» կուսակցության անունից փոխնախագահի կարգավիճակով ամբիոն է բաձրանում Բինալի Յըլդըրըմը, որ 2014-18 թթ., մինչև Թուրքիայում լիարժեք նախագահական կարգերի հաստատումը, 4 տարի անընդմեջ վարչապետի պաշտոնն է վարել:
Նա պիջակի ծոցագրպանից հանում է Թուրքիայի դրոշը մի ձեռքում՝ դրոշ, իսկ մյուսում՝ թուրքական օրհներգի տեքստը, սկսում է կարդալ առաջին քառյակը, բայց՝ սխալ: Այսինքն՝ բացարձակ չգիտի բառերը: Դա աշխուժություն է առաջացնում նիստերի դահլիճում, բայց Բինալի Յըլդըրըմն իրեն չի կորցնում, այլ պատգամավորներին հորդորում՝ «Պետք է դրոշակ պահել գրպանում»:
Ընդդիմադիր լրատվամիջոցները, մասնավորապես «Halk TV»-ն, «Birgun.net»-ը Յըլդըրըմի ելութին անդրադառնալիս նշում են, որ նա՝ որպես երկրում իշխող կուսակցության փոխնախագահ, նախարարի և վարչապետի պաշտոններ վարելով հանդերձ, չկարողացավ Մեջլիսում ընթերցել Թուրքիայի օրհներգից անգամ 4 տող, եթե նա թղթի վրայից կարդալ չի կարողանում, ուրեմն բացարձակ չգիտի օրհներգի բառերը:
Հայկոբ Չաքրյան
