Երևանի կենդանաբանական այգին շնորհավորում է երեխաների տոնը: Ամեն տարի՝ հունիսի 1-ին, կենդանաբանական այգին մարդաշատ էր լինում: Կազմակերպվում էին բազմազան հանդիսություններ, մրցույթներ. այգին լցվում էր մանուկների ժպիտներով, երգ ու պարով, երաժշտությամբ: Այս անգամ կենդանաբանական այգու պատասխանատուները սահմանափակվել են շնորհավորական ուղերձով:
«Սիրելի՛ փոքրիկներ, շնորհավորում ենք ձեզ ամենալուսավոր տոնի՝ Երեխաների իրավունքների պաշտպանության միջազգային օրվա առթիվ:
Թող այս օրը և ձեր կյանքի մնացած բոլոր օրերը լցված լինեն անսպառ ուրախությամբ ու զիլ ծիծաղով, երազանքների ու հրաշքների իրականացմամբ:
Թող ձեր մանկությունն անցնի խաղաղ ու անհոգ, մեծանաք առողջ ու երջանիկ՝ սիրով ու հոգատարությամբ շրջապատված։
Կենդանաբանական այգին ամեն տարի մանուկների տոնը նշել է մեծ շուքով։ Այս տարի այս օրը մի քիչ տխուր է, բայց կարևոր է գիտակցությունը, որ մեր մեծ ու փոքր այցելուների առողջությունն ու անվտանգությունը վեր է ամեն ինչից։
Կրկին շնորհավորելով տոնի առթիվ` անամպ երկինք ու պայծառ մանկություն ենք մաղթում բոլորիդ»:
