Կառավարությունը հունվարի 11-ի նիստում որոշեց Արմավիրի մարզպետ նշանակել Դավիթ Խուդաթյանին:
Նշենք, որ Դավիթ Խուդաթյանը ՔՊ կուսակցության Արմավիրի տարածքային խորհրդի նախագահն է, նաև Արմավիր խոշորացված համայնքի ղեկավարը։
Մամուլն ավելի վաղ գրել էր, որ Նիկոլ Փաշինյանը կողմնորոշվել է Արմավիրի նոր մարզպետի հարցում եւ այդ պաշտոնում կնշանակի իր սանիկ Դավիթ Խուդաթյանին, որը Արմավիր խոշորացված համայնքի ղեկավարն է և ՔՊ կուսակցության Արմավիրի տարածքային խորհրդի նախագահը։
Երեկ Խուդաթյանի աշխատակազմում՝ Արմավիր խոշորացված համայնքում, արդեն վերջինիս փոխարինողի հարցն է քննարկվել։
Ըստ որոշ տեղեկությունների՝ համայնքի ավագանին Խուդաթյանի փոխարեն ղեկավար կընտրի նրա առաջին տեղակալ Վարշամ Սարգսյանին։
Նշենք, որ մի քանի օր առաջ «ցնցուղի պատճառով» Նիկոլ Փաշինյանն աշխատանքից ազատեց Արմավիրի մարզպետ Էդվարդ Հովհաննիսյանին։
Կամաց-կամաց բացահայտվում է, թե ինչի համար էր ցնցուղ-շոուն։ Ի վերջո, սանիկը բազմաթիվ հարցերում կարող է ավելի հուսալի լինել, քան ուրիշ մեկը։
