Եվրոպական խորհրդարանի 40 անդամներից բաղկացած խումբը կոչ է արել Եվրամիությանը պատժամիջոցներ կիրառել Իսրայելի կառավարության դեմ և կասեցնել երկրի հետ կնքված առևտրային համաձայնագիրը։ Այս մասին ասված է խորհրդարանականների համատեղ հայտարարության մեջ, տեղեկացնում է Euronews-ը:
Փաստաթղթում ԵՄ 14 երկրների օրենսդիրներ պնդում են, որ Իսրայելի վարչապետ Բենիամին Նեթանյահուի գլխավորած կառավարությունը պատասխանատվության ենթարկվի «Ժնևի կոնվենցիան և միջազգային մարդասիրական իրավունքը կոպտորեն խախտող» գործողությունների համար՝ պահանջելով, որ Բրյուսելը վճռական գործողություններ ձեռնարկի Գազայի հատվածում մարդասիրական ճգնաժամի հետ կապված։
Նշվում է նաև, որ Եվրախորհրդարանի պատգամավորներն ուղղակիորեն կոչ են անում պատժամիջոցներ կիրառել Իսրայելի կառավարության դեմ, ինչպես նաև կասեցնել ԵՄ-ի և Իսրայելի միջև համաձայնագիրը։
Հիշեցնենք, որ 2000 թվականին ուժի մեջ մտած փաստաթուղթը հրեական պետությանը տալիս է առևտրային արտոնություններ համայնքում, ինչպես նաև հասանելիություն մի շարք եվրոպական ֆինանսավորման ծրագրերին։
