ԱԺ փոխխոսնակ Ռուբեն Ռուբինյանը չի համարում, որ ֆեյսբուքյան իր գրառմամբ թիրախավորել է որոշ լրատվամիջոցների։ Ըստ ՔՊ-ական պաշտոնյայի՝ իր գրառումն ընդամենը քննադատություն է։
Հիշեցնենք, որ երեկվա իր գրառման մեջ Ռուբինյանը, մասնավորապես, նշել էր.
«Պարսավանքի արժանի են նաև այն բոլոր լրատվամիջոցները, որոնք պաշտպանում են կաշառակեր սրիկային: Հատկապես արժե հիշատակել Հրապարակ կոչվող լրատվական աղբանոցը և վերջինիս անդաստիարակ գլխավոր խմբագիր Արմինե Օհանյանին»։
Ըստ Ռուբինյանի՝ լրատվամիջոցի թիրախավորումը հետևյալն է. օրինակ՝ երբ լրագրողին ծեծել են տալիս, երբ լրագրողի վրա գործ են կարում, նստացնում են, երբ մտնում են խմբագրություն, համակարգիչներն առգրավում են։
«Իմ ասածը քննադատություն է. սովորեք քննադատության։ Վիրավորանք չէ»,- ասաց նա։
Լրագրողների դիտարկմանը, որ մարդուն «անդաստիարակ» անվանելը վիրավորանք է, ոչ թե քննադատություն, Ռուբինյանը պատասխանեց.
«Դե հիմա, ես պատճառ ունեցել եմ դա ասելու համար, և դա վիրավորանք չէ»։
Հարցին՝ ինչպե՞ս է ստացվում, որ իշխանությունը Կաթողիկոսի հետ կապված հայտնի ձայնագրությունն այսպես ասած «ուծեչկա» է անում Տարոն Չախոյանի անվան հետ կապվող լրատվակաան կայքերից մեկում, Ռուբինյնաը պատասխանեց՝ ինքը ոչ մի «ուծեչկա» չի արել։
«Իսկ ո՞նց է լինում, որ տարբեր ստահոդ լուրեր սպրդում են տարբեր լրատվամիջոցներով, որոնց ներկայացուցիչներն ԱԺ-ում են»,-հարց հնչեցրեց նա։
