ԵՄ-ն Խաղաղության եվրոպական հիմնադրամի միջոցով 62 միլիոն եվրո է հատկացրել Վրաստանին՝ նրա պաշտպանունակությունն ուժեղացնելու համար։
Ինչպես հաղորդում է ՏԱՍՍ-ը, ԵՄ արտաքին ծառայության ղեկավար Ժոզեպ Բորելը Թբիլիսի կատարած այցի նախօրեին ասել է վրացական Civil պորտալին տված հարցազրույցում։
«Վրաստանի պաշտպանության ուժերի համար տեխնիկայի առաջին խմբաքանակը Վրաստան է ժամանել արդեն ապրիլին, մատակարարումները շարունակվում են: Այս տեխնիկան կենսական նշանակություն կունենա»,- ասել է նա։
Եվրամիության արտաքին ծառայության ղեկավարը Թբիլիսի կժամանի հինգշաբթի։ Երկօրյա այցի ընթացքում նախատեսված են նրա բանակցությունները նախագահ Սալոմե Զուրաբիշվիլիի, վարչապետ Իրակլի Ղարիբաշվիլիի, արտգործնախարար Իլյա Դարչիաշվիլիի հետ։ Բորելը հանդիպումներ կունենա նաև Վրաստանի խորհրդարանում։ Այցի նպատակն է ծանոթանալ Վրաստանի՝ ԵՄ անդամակցության կարգավիճակ շնորհելու 12 առաջարկների կատարման ընթացքին։
