Իրավապաշտպան Լարիսա Ալավերդյանին զարամացնում է, որ Սուրբ Աննա եկեղեցում Նիկոլ Փաշինյանի ներկայությամբ երեկ տեղի ունեցած միջադեպից հետո երկվորյակ եղբայրների նկատմամբ քրեական վարույթ է նախաձեռնվել երկու հոդվածներով՝ խուլիգանություն և պաշտոնատար անձի օրինական ծառայողական կամ քաղաքական գործունեությանը միջամտելը։
«Եվս մեկ անգամ ընդգծենք, որ այս անձի կողմից եկեղեցին քաղաքականության համար օգտագործելը դարձել է սովորութային նորմ։ Առաջին խնդիրն այն է, որ այն, ինչի մեջ մեղադրվում են դպրոցական տղաները, խոսում է այն մասին, որ ոստիկանությունը, գործը հարուցած մարմինը չեն հասկանում՝ ինչի մասին է խոսքը։ Եթե վարչապետի պաշտոնը զբաղեցնող անձը գնում է եկեղեցի՝ իրականացնելու քաղաքական գործունեություն, իր դեմ պետք է գործ հարուցվի»,-Azg.am-ի թղթակցի հետ զրույցում ասաց Լարիսա Ալավերդյանը։
Ըստ նրա՝ պետք է գործ հարուցվի նաև եղբայրներից մեկի ծնոտին հարվածած թիկնապահի և նրանց նկատմամբ ուժ կիրառած քաղաքացիական հագուստով իրավապահների դեմ։
«Դիմելով դատախազին և պատկան մարմիներին՝ պահանջում եմ, որ գործ հարուցվի նախևառաջ եկեղեցում քաղաքական գործունեություն իրականացնելու փորձի համար՝ Նիկոլ Փաշինյանի դեմ, երկրորդը՝ ոստիկանների դեմ, որոնք ինքնիրավչություն են թույլ տվել և իրենց պարտականությունների սահմանները չեն ճանաչել, ոչ համաչափ ուժ են գործադրել։
Ես համոզված եմ՝ կլինեն դատապաշտպաններ, որոնք հստակորեն կձևակերպեն իրենց պաշտպանությունը ձերբակալված անձանց նկատմամբ։ Մենք ունենք բավականին պատրաստակամ դատապաշտպաններ, որոնք ոչ միայն մտածում են՝ ում պաշտպանեն, այլև՝ երկիրն իրավական պետություն դարձնելու մասին։ Համոզված եմ, որ այդ անձանց նկատմամբ գործ հարուցելու որևէ իրավական հիմք չկա։ Ինձ հայտնի է այդ մեթոդը, որ գործ են հարուցում ոչ թե իրական օրինազանցների, այլ այդ օրինազանցությունից պաշտպանվողների դեմ»,- ասաց իրավապաշտպանը՝ նկատելով, որ այդ արատավոր պրակտիկան կիրառելի է ոչ միայն Հայաստանում, այլ նաև ամենահետամնաց երկրներում։
Լարիսա Ալավերդյանը ափսոսանք հայտնեց, որ ապաշնորհ վարչակազմի պատճառով Հայաստանը մարդու իրավունքների ոլորտում գնալով հետընթաց է ապրում։
Ամփոփելով՝ մեր զրուցակիցը շեշտեց՝ արդարադատություն իրականացնող ողջ համակարգն օր առաջ պետք է հասկանա, որ ոչ իրավական գործողությունները ստվերելու են ոչ միայն Հայաստանի, այլ նաև Եվրոպայի վարկանիշը։
Հիշեցնենք, որ նախօրեին Սուրբ Աննա եկեղեցում տեղի ունեցած միջադեպից հետո ձերբակալված եղբայրները Երևանի Ա. Մարգարյանի անվան թիվ 29 ավագ դպրոցի 12-րդ դասարանի աշակերտներ են: Երևանի Սուրբ Աննա եկեղեցում Փաշինյանի ներկայությամբ տեղի ունեցած միջադեպից մեկ օր անց քրեական վարույթ է նախաձեռնվել երկու հոդվածներով՝ խուլիգանություն և պաշտոնատար անձի օրինական ծառայողական կամ քաղաքական գործունեությանը միջամտելը:
Հիշեցնենք, որ դեպքը տեղի էր ունեցել երեկ, երբ Նիկոլ Փաշինյանն անվտանգության աշխատակիցների, մյուս պաշտոնյաների ուղեկցությամբ փորձում էր դուրս գալ՝ պատարագը դեռ չավարտված։ Երբ անվտանգության աշխատակիցները ճանապարհ էին բացում, ամբոխից մի երիտասարդ վրդովվեց՝ հորդորելով չհրել իրեն և ասելով, որ ցանկանում է իր տեղում կանգնած մնալ:
«Տենց չնայես ինձ», – դիմեց երիտասարդը վարչապետին, ինչից հետո փորձեց ձեռքով հարվածել:
Հատկանշական է, որ փաստաբան Լուսինե Մարտիրոսյանի տեղեկացմամբ՝ երկվորյակ եղբայրներն ունեն բանտարկության հետ անհամատեղելի հիվանդություն։
