Եթե մի օր Երևանից լսեք Ադրբեջանի առաջնորդի ելույթը, իմացեք, որ Իլհամ Ալիեւը Կովկասը վերադարձրել է Պետրոս Առաջինից. ադրբեջանցի պատգամավոր

Հոկտեմբերի 31-ին Ադրբեջանի խորհրդարանի՝ Միլի Մեջլիսի նիստում պատգամավոր Զահիդ Օրուջը հանդես է եկել հայտարարությամբ, որում փորձել է Ադրբեջանի «հաղթանակը» ներկայացնել որպես աշխարհում եզակի երևույթ. հայտնում է  Խրոնիկան Կավկազան։

Ադրբեջանական Toplum TV պարբերականի փոխանցմամբ՝ Օրուջի խոսքով ՝ ներկայումս աշխարհում գոյություն ունի 61 զինված հակամարտություն, սակայն դրանցից ոչ մեկը չի հանգեցրել կայուն խաղաղության կամ հստակ արտահայտված հաղթողի ի հայտ գալուն: Օրուջը հայտարարել է, որ Ադրբեջանը «միակ պետությունն է, որն ամենակարճ ժամանակահատվածում եւ նվազագույն կորուստներով հասել է առավելագույն արդյունքների»:

Անդրադառնալով Հայաստանի թեմային, Օրուջը հայտարարել է, որ «հայերը սպասում են Բաքվի որոշմանը՝ ներկայացնելու «իրական Հայաստանը», այլ ոչ թե Մեծ, Կովկասյան, կամ Ծովից ծով Հայաստանը»։

«Եթե մի օր Երևանից լսեք Ադրբեջանի առաջնորդի ելույթը, իմացեք, որ Իլհամ Ալիեւը Կովկասը վերադարձրել է Պետրոս Առաջինից: Դա կլինի ամենամեծ վերադարձը»,- բարբաջել է Օրուջը։