Միջազգային իրավական ինստիտուտները աշխատում են, և դա նորմալ գործընթաց է, և պետք է տեղի ունենա, և դա մեր գնահատականը չի փոխում, կառավարության նիստին հաջորդած ճեպազրույցի ժամանակ ասաց վարչապետ Նիկոլ Փաշինյանը՝ անդրադարնալով Մարդու իրավունքների եվրոպական դատարանի կայացրած վճռին, որով Ադրբեջանը մեղավոր է ճանաչվել հայ զինծառայող, մայոր Հայկ Թորոյանին խոշտանգելու և գլխատելու համար։
Հարցին՝ ինչո՞ւ է «հավասարության նշան» դնում հայկական և ադրբեջանական կողմերի գործողությունների միջև, Փաշինյանն ասաց․
«Ես Հայաստանի և Ադրբեջանի գործողությունների միջև հավասարության նշան երբեք չեմ դրել։ Դա արել է կալուգացի օլիգարխը, երբ որ պատերազմի ժամանակ կոչով էր հանդես գալիս Հայաստանին և Ադրբեջանին՝ ըստ էության մեզ ու Ադրբեջանին դնելով նույն տրամաբանության մեջ։
Ինչ վերաբերում է իմ ասածին, իմ ասածն այն է, որ խաղաղություն է հաստատված, և խաղաղության նկատմամբ պետք է հոգ տանել, հակառակ դեպքում այդ խաղաղությունը շատ հեշտությամբ կարելի է ջախջախել և վերացնել, որի արդյունքում մենք կունենանք այլ բազմաթիվ դեպքեր, որոնք, ենթադրում եմ, Ադրբեջանն էլ կունենա, որ հետո ստիպված կլինենք միջազգային ատյաններում հետամուտ լինել»։
