Եղել են օբյեկտիվ հանգամանքներ, որոնք նոր են ի հայտ եկել. դա 2025 թվականի տնտեսական աճի ցուցանիշն է, որը մեզ հիմք է տալիս հարկաբյուջետային քաղաքականության մասով այլ հետևություններ անել, որոնք մինչև այդ ավելի ռիսկային էին թվում: Այս մասին այսօր լրագրողների հետ ճեպազրույցում նշեց ՀՀ աշխատանքի և սոցիալական հարցերի նախարար Արսեն Թորոսյանը՝ անդրադառնալով ապրիլի 1-ից կենսաթոշակների բարձրացմանը։
«Որոշում է կայացվել, որ գրեթե բոլոր կենսաթոշակները (խոսքը 667 հազար մարդու է վերաբերում) բարձրանալու են 10 հազար դրամով, իսկ որոշ կենսաթոշակներ ավելանալու են ավելի շատ: Մենք ունենք դեպքեր, որ բարձրանալու է մինչև տասնյակ հազար դրամներ, այսինքն՝ կերակրող կորցնողի և այլն:
Շատ քիչ դեպքերում այդ բարձրացումը կարող է լինել 7000-8000 դրամ: Խոսքը վերաբերում է փոքրաթիվ այն քաղաքացիներին, որոնք արդեն իսկ բարձր կենսաթոշակ են ստանում, այսինքն՝ միջինից մոտ 2 անգամ բարձր ստացող քաղաքացիներին է վերաբերում:
Բյուջետային ծախսերը, որոնք պետք կգան այս տարի այս ծախսը հոգալու համար, կլինեն մոտ 80 մլրդ դրամի շրջանակում, որը մենք ունենք, և վերաբաշխումների միջոցով կտեղափոխենք մեր բյուջե:
Իսկ բուն որոշումը, որը մի որոշում չէ, լինելու են մի քանի որոշումներ, հավանաբար կա՛մ կառավարության մոտակա նիստին, կա՛մ դրանից հետո կընդունվի, որովհետև պետք է նաև ծրագրային ապահովման բանաձևերի մեջ փոփոխություններ իրականացնենք, որի համար անհրաժեշտ են իրավական հիմքեր»,- ասաց նախարարը:
