Գործող կառավարությունն այնքան անպատրաստ է ամեն ինչի, որ նույնիսկ կեղծիքների կարող է ընդունակ չլինել․ քաղաքագետ

Երկիրը հիմա պատրաստ չէ ընտրությունների։ Քաղաքական դաշտը փլուզված է։ «Փաստինֆո»-ի հետ զրույցում ասաց քաղաքագետ Ստեփան Դանիելյանը՝ անդրադառնալով հունիսի 20-ին նախատեսված արտահերթ ընտրություններին։

Քաղաքագետի խոսքով այժմ արտաքին աշխարհի հետ կապված լուրջ խնդիրներ ունենք։ Ընդ որում՝ ընտրությունների պատճառով տնտեսությունը հերթական ցնցումներին է գնալու․ «Լավագույն լուծումն այն էր, որ ընտրությունները հետաձգվեին, այս կառավարությունը հրաժարական տար և գոնե մեկ տարի ժամանակավոր կառավարություն ձևավորվեր, ժամանակ ունենայինք, պատրաստվեինք ընտրությունների։ Սակայն քանի որ մենք ոչ ադեկվատ ղեկավարություն ունենք, հասել ենք այս հանգրվանին»,-նշեց քաղաքագետը։

Վերջինիս դիտարկմամբ՝ արտահերթ ընտրությունները կխորացնեն երկրում առկա ճգնաժամը, երկիրը կտանեն մեծ ցնցումների․ «Լարվածությունը շատ մեծ է լինելու, շատ նյարդային ընտրություններ են լինելու, հնարավոր է անգամ որոշ ընտրատեղամասերում բացասական դեպքեր լինեն։ Նախընտրական մթնոլորտն էլ բացասական և թշնամական է լինելու։ Երևի այս մի փորձությունով էլ պետք է անցնենք»,-ասաց Ստեփան Դանիելյանը։

Հարցին՝ հնարավոր կլինի՞ կազմակերպել առանց կեղծիքների ընտրություններ՝ քաղաքագետը նշեց, որ իշխանության ներկայացուցիչները բազմիցս ցուցադրել են՝ իրենք պետական մտածողություն չունեն, նրանց մտածողությունն օրենքներից, սահմանադրութունից, կարգ ու կանոնից դուրս է․ «Նրանք միշտ պատրաստ են խախտել օրենքը, միշտ պատրաստ են կոռուպցիայի և վստահ եմ՝ նախընտրական կեղծիքների, ադմինիստրատիվ ռեսուրս օգտագործելու փորձեր կլինեն։ Նրանք ամեն ինչի ընդունակ են, որովհետև այս թիմի անձնական ինքնափրկության խնդիրն է դրված»։

Դիտարկմանը՝ արդյոք կարո՞ղ ենք արձանագրել, որ ընտրություններից հետո քաղաքական դաշտում առանձնապես փոփոխություններ չեն լինի՝ հաշվի առնելով իշխանությունների կողմից վարչական ռեսուրսի հնարավոր կիրառումը, քաղաքագետն ասաց․ «Չենք կարող ասել։ Ռեսուրս փորձել օգտագործելը և կարողանալ օգտագործելը տարբեր են։ Գործող կառավարությունն այնքան անպատրաստ է ամեն ինչի, որ նույնիսկ կեղծիքների կարող է ընդունակ չլինել, սակայն խոսքը գնում է այն մասին, որ կփորձեն նման բան անել»,-ասաց Ստեփան Դանիելյանը։

Թե ինչու ԲՀԿ-ն փոխեց իր դիրքորոշումը և համաձայնեց արտահերթ ընտրությունների, քաղաքագետը կարծում է, որ կառավարությունը իրավիճակն այնպիսի փակուղի է մտցրել, որ գուցե ստեղծված իրավիճակում այս ցնցումներն ավելի լավ տարբերակ են, քան իշխանությունների երկար մնալը։

Փաստինֆո