Ուշադրություն պետք է դարձնել այն հանգամանքի վրա, որ Ադրբեջանում պահվող հայ գերիների վերաբերյալ հայտարարության տեքստը, որը նախապես տրամադրվել էր նաև իշխող քաղաքական ուժին, որևէ բովանդակային քննարկման չդրվեց նրանց կողմից, լրագրողների հետ զրույցում հայտարարեց «Պատիվ ունեմ» խմբակցության քարտուղար Տիգրան Աբրահամյանը։
Նրա խոսքով՝ իշխանությունը ոչինչ չուներ ասելու հայտարարության հետ կապված։
«Իշխանությունն ուներ քաղաքական որոշում՝ հայտարարությանը դեմ քվեարկելու և այս պարագայում դա արտահայտվեց չքվեարկելով և նախագիծը, որը հայտարարության ձևով ներկայացվեց, պարզապես տապալվեց։ Այն պարագայում, երբ Ադրբեջանն իր բառապաշարը Հայաստանի նկատմամբ բավականին կոշտացնում է, վերահաստատում է իր նախապայմանները «Խաղաղության պայմանագրի» ստորագրման համատեքստում, երբ կոչ է արվում բոլոր գերիների վերադարձ, այդ հայտարարությունը, նախագիծը իշխող խմբակցությունը տապալում է»,-նշեց պատգամավորը։
Աբրահամյանի դիտարկմամբ՝ սա կարելի է դիտարկել Հայոց ցեղասպանության ճանաչման գործընթացի զուգահեռում, երբ ՀՀ արտաքին գերատեսչության պատասխանատուն խորհրդարանում հայտարարում է, որ դա իրենց օրակարգային հացերի մեջ չէ.
«Տարիներ շարունակ ՀՀ-ն պայքարել է Հայոց ցեղասպանության ճանաչման, ժխտողականության դեմ, ՀՀ ԱԳ նախարարությունը թուրքադրբեջանական նարատիվների մեջ տեղավորվող հայտարարություն է անում։ Նույնն էլ սրան է վերաբերում. ամբողջ աշխարհից տարբեր կոչեր են հնչում գերիների վերադարձի մասին, բայց ՀՀ խորհրդարանում ներկայացված իշխանական խմբակցությունը այսպիսի զավեշտալի քայլ է անում»։
Ընդդիմադիր պատգամավորի պնդմամբ՝ այս քայլը նվեր էր Ադրբեջանին և հնարավորություն՝ արտաքին աշխարհում տարբեր դերակատարողների հետ հանդիպումներում ի ցույց դնելու ՀՀ իշխանությունների այս մոտեցումը՝ գերիների վերաբերյալ.«Սա վատ նախադեպ է դառնալու՝ ադրբեջանական քարոզչական էլեմենտներն առաջին պլան բերելու։ Գերիների թեման ՀՀ իշխանությունների համար երբեք առաջնային օրակարգ չի եղել»։
