Ապրիլի 25-ին Բեռլինի Սուրբ Հեդվիգ Մայր Տաճարի մոտ տեղադրված՝ Հայոց ցեղասպանության զոհերի հիշատակը հավերժացնող խաչքարի մոտ տեղի ունեցավ ծաղկեպսակի զետեղման արարողություն:
Հայաստանյայց առաքելական եկեղեցու Գերմանահայոց թեմի առաջնորդ Գերաշնորհ Տ․ Սերովբե եպիսկոպոս Իսախանյանի գլխավորությամբ հնչեցվեց բարեխոսական աղոթք:
Գերմանիայում ՀՀ դեսպանությունից հայտնում են, որ միջոցառմանը ներկա էին ԳԴՀ Բունդեսթագի փոխնախագահ Իվոնե Մագվասը, ԳԴՀ-ում ՀՀ դեսպան Վիկտոր Ենգիբարյանը, Գերմանահայոց կենտրոնական խորհրդի նախագահ Հովնաթան Շպանգենբերգը, ԳԴՀ ԱԳՆ, ինչպես նաև գերմանահայ համայնքային կառույցների ներկայացուցիչներ:
Նույն օրը Բունդեսթագում տեղի ունեցավ Հայոց ցեղասպանության զոհերի հիշատակին նվիրված արարողություն, որին հաջորդեց քննարկում հանդիպմանը մասնակից պատգամավորների հետ:
Բացման խոսքով հանդես եկավ պատգամավոր Դիթմար Նիթանը։ Ելույթներով հանդես եկան ՀՀ դեսպան Վիկտոր Ենգիբարյանը, Գերմանահայոց կենտրոնական խորհրդի նախագահ Հովնաթան Շպանգենբերգը և Հաագայի միջազգային քրեական դատարանի նախկին գլխավոր դատախազ Լուիս Մորենո Օկամպոն։
