Լավ օրից չէ, որ այսօր հավաքվել ենք այստեղ, բայց նայելով մեր ժողովրդին, համոզվում եմ, որ կրկին զարթոնքը լինելու է Հայաստանում, կրկին ոտքի ենք կանգնելու և Արցախն ու Հայաստանը տանելու ենք առաջ։ Այս մասին Ազատության հրապարակում հանրահավաքի ընթացքում ասել է ՀՀ ՊՆ նախկին նախարար, Արցախի հերոս Սեյրան Օհանյանը։
«1988թ այս օրերին համազգային շարժմամբ ձեռքբերված արժեքները, առաջընթացը, այսօրվա ապիկար իշխանությունը, ապազգային իշխանությունը՝ իրենց «գրագետ», «կառուցողական» ընկերների հետ պայմանավորված, մեր երկիրը տարան դեպի անկում։ Այն արժեքները, որոնք ձեռք էինք բերել այս 30 տարիների ընթացքում, բավարար էին, որ այս 30 տարվա պատմությունը կերտենք և գնանք դեպի առաջ, ստեղծենք մեր պետությունը և նրա համար անչափ կարևոր հայկական բանակը»,- նշեց Օհանյանը՝ հավելելով, որ ազատության տարիներին մեր գործունեությունը կառուցել ենք անկախության, ինքնիշխանության հայկական հզոր բանակի շուրջը, որն օրեցօր կատարելագործվել է և պարտությունը բանակի վրա գցելը ճիշտ չէ, բարոյական չէ։ Նրա խոսքով՝ այս պատերազմի ժամանակ բանակը մեն-մենակ հայտնվեց հակառակորդի հետ միասին, բանակը մնաց առանց թիկունքի։
«Հայ հրամանատարը, հայ զինվորականը, հայ զինվորը մարտի դաշտում հերոսաբար կռվել են, իրենց կյանքն են տվել մեր հայրենիքի, հայ ժողովրդի արժանապատվության համար»,- նշեց Օհանյանը՝ ընդգծելով, որ բանակի թիկունքը շատ փխրուն է եղել՝ մինչև պատերազմը և պատերազմի ընթացքում, որովհետև այս իշխանությունները բանակի նկատմամբ իրենց ռազմավարությունը կառուցել են ոչ թե ռազմավարական բարձր նշակետից, այլ՝ իջեցրել են ամենացածր, մինչև՝ վարտիքի մակարդակի։ Բացի դա՝ Օհանյանն ընդգծեց, որ հնի և նորի բաժանելով, բանակն էլ են բաժանել հնի և նորի։
Օհանյանը նաև անդրադարձավ ՀՀ ԶՈՒ ԳՇ նախկին պետ Մովսես Հակոբյանի ազատման հանգամանքներին՝ նշելով, որ անօրինական քայլ է կատարվել նրա նկատմամբ, որովհետև համապատասխան պայմանագրով և համապատասխան տարիների ծառայություն պետք է իրականացներ։
« Ինչպե՞ս հասկանալ, երբ այս իշխանությունների ղեկավարը հրավիրում և ԳՇ պետին ասում է՝ ես ուզում եմ ազատվել բոլոր հներից։ Ի՞նչ է նշանակում հին բանակում։ Նշանակում է՝ տարիքով անձնավորություն՝ համապատասխան գիտելիքներով, հմտություններով և ունակություններով, նշանակում է բարձր պաշտոնատար անձ, որն անցել է այդ ծառայողական աստիճանով և ավելի լավ է տիրապետում այսօրվա ռազմական թատերաբեմը, ավելի լայն աշխարհայացք ունի։ Հին նշանակում է բարձր կոչում, որ յուրաքանչյուր կոչման համար գիշեր-ցերեկ քրտինք, արյուն թափելով, չորս անգամ վիրավորվելով, ասում ես՝ ազատվիր, որովհետև դու հին ես։ Ինչ է նշանակում հին, նշանակում է՝ փորձված մարտական կարողությունների տեր։ Աֆղանստանով, Արցախյան առաջին պատերազմով, Ապրիլյան պատերազմով անցած անձին ազատել պաշտոնից և արդյունքը մենք տեսնում ենք՝ կառավարման մեջ թերություններ, թիկունքը բաց, ժողովրդին չենք կարողանում համախմբել»,- նշեց Օհանյանը։
