Բագրատ սրբազանի և մյուսների գործով այսօրվա դատական նիստին չէր ներկայացել մեղադրյալներից մեկի պաշտպան Հովսեփ Սարգսյանը, ինչի պատճառով էլ մյուս պաշտպանները դատարանին միջնորդեցին հետաձգել նիստը՝ հիշեցնլով, որ պաշտպանի բացակայությունը հարգելի է:
Փաստաբաններից Լիպարիտ Սիմոնյանը պնդեց, որ եթե այսօր հանդուրժեն մեղադրյալի իրավունքի խախտումը՝ առանց պաշտպանի մասնակցությամբ դատական նիստի շարունակումը, ապա ստիպված են լինելու այսուհետ այլ խախտումներ ևս հանդուրժել:
Փաստաբան Ռուբեն Մելիքյանն էլ իր հերթին նկատեց՝մոտ ենք այն իրավիճակին, որ իրենց ներկայությամբ կարող են լեգիտիմացնել ապօրինությունները:
«Մեր գործընկերոջ բացակայության դեպքում այլ բան քրեական դատավարության օրենսգիրքը չի նախատեսում, քան հետաձգելը»,- ասաց նա:
Պաշտպաններից Լիպարիտ Սիմոնյանն էլ հայտարարեց, որ հարգելով հանդերձ բոլորին՝ չի կարող մասնակցել մի նիստի, որի ընթացքում խախտվում է մեղադրյալի իրավունքը: «Ստիպված եմ լքել նիստերի դահլիճը»: Դատարանը որոշեց մի քանի րոպեով հետաձգել նիստը: Երբ դատարանը վերադարձավ ընդմիջումից, պաշտպանները դատարանում չէին, ինչի պատճառով կրկին ընդմիջում հայտարարվեց:
