Արցախցիների ներկայացուցիչները քիչ առաջ դուրս եկան կառավարության շենքից:
Ինչպես լրչագրողներին հայտնեց Արցախի ՄԻՊ Գեղամ Ստեփանյանը, հանդիպումը պլանավորածից երկար է տևել:
Արցախցիները հանդիպել են փոխվարչապետ Տիգրան Սարգսյանի գրասենյակի ղեկավար Արմեն Ադիլխանյանի հետ, ներկա է եղել աշխատանքի և սոցիալական հարցերի փոխնախարար Դ. Խաչատրյանը, ինչպես նաև փոխվարչապետի խորհրդական Աննա Գասպարյանը։
«Բնակվարձի ծրագիրը շարունակելու հնարավորության շուրջ որևէ ձևով համաձայնություն չեղավ։ Այսինքն՝ կատարվեց այն, ինչ ես մինչև մտնելն ասում էի։ Հերթական անգամ քննարկում է լինելու՝ քննարկման համար։ Նշեցին, թե կառուցողական են տրամադրված ծրագրերի բարելավումների վերաբերյալ, սակայն ես իմ փորձից կարող եմ ասել, որ անիմաստ է։
Կարծեք՝ զուգահեռ իրականությունում ենք ապրում, որ իշխանությունները չեն տեսնում, որ մարդիկ ծանր իրավիճակում են։ 50 հազար մարդու զրկել են բնակվարձի աջակցությունից, բայց ասում են, մենք չենք դադարեցրել ծրագիրը»,-նշեց Արցախի ՄԻՊ-ը։
Հիշեցնենք, որ արցախցիները պահանջում են վերականգնել բնակվարձի 40+10 աջակցության ծրագիրը։
