Փաշինյանի հարցերի շարանն ի վերջո տանում է նրան, որպեսզի Հայաստանում ամրապնդվի թուրքական այն նարատիվը, որ կա՛մ Հայոց ցեղասպանություն չի եղել, կա՛մ եթե եղել են հայերի կոտորածներ, ապա հենց հայերն են դրանում մեղավոր, այսօր լրագրողների հետ զրույցում ասաց «Հայաքվե» նախաձեռնության համակարգող Ավետիք Չալաբյանը՝ անդրադառնալով նախօրեին Շվեյցարիայի հայ համայնքի հետ հանդիպման ժամանակ Ցեղասպանության թեմայով Նիկոլ Փաշինյանի հայտարարություններին։
«Այսօր ունենք մի իրականություն, երբ ՀՀ իշխանությունը փորձում է թուրքական խոսույթը պարտադրել մեր ժողովրդին՝ մաս-մաս, կաթիլ-կաթիլ, որ մեր մեջ կասկած սերմանի՝ Ցեղասպանություն եղե՞լ է, թե ոչ կամ հնարավոր է՝ զո՞հն էր մեղավոր, ոչ թե դահիճը»,- ասաց նա։
Ասուլիսին ներկա «Հայաքվե» խորհրդի անդամ, պատմաբան Մենուա Սողոմոնյանն իր հերթին նշեց՝ ականատես ենք մի իրողության, երբ Հայոց ցեղասպանության վերաբերյալ թուրքական ժխտողականությունը ներթափանցում է Հայաստան՝ ՀՀ ղեկավարման բարձրագույն օղակ։
«ՀՀ վարչախումբն իր վրա է վերցնում Ցեղասպանության ժխտման, նենգափոխման թուրքական ժխտողականության շարունակությունը։ Մինչ այս՝ նորանկախ Հայաստանում, պաշտոնական դիրքորոշումը հետևյալն էր՝ պատմական իրողությունը քննարկամն առարկա չէ, Հայաստանը չի մտնում որևէ գործընթացի մեջ, որը նպատակ կունենա քննարկելու եղելությունը և դրա հետ կապված հարցերը։
Այսօր Նիկոլ Փաշինյանն անոնսեց, որ իր վրա է վերցնում Ցեղասպանության եղելությունը պատմաբանների կողմից քննարկելն, ուսումնասիրելն ու գնահատական տալը։ Սրանով, բացի նրանից, որ ինքը հանդիսանում է Արցախն Ադրբեջանի մաս ճանաչած, Արցախի էթնիկ զտման դուռը բացած պաշտոնյա, նաև իր վրա վերցնում է Հայոց ցեղասպանության թեման փակողի, ժխտողի, կասկածի տակ դնողի ֆունկցիան»,- ասաց պատմաբանը՝ հավելելով, որ Նիկոլ Փաշինյանի անունն այսուհետ պետք է դասվի Հայոց ցեղասպանությունը ժխտող թուրք պատմաբանների և գիտնականների անունների շարքին։
Մենուա Սողոմոնյանը չբացառեց, որ իշխանությունների հրահանգները սիրահոժար կատարող պատմաբանների որոշակի շրջանակների պատվեր իջեցվի Ցեղասպանության եղելությունը շարադրել նոր լույսի ներքո։
«Եթե նման բան լինի, ամենևին զարմանալի չի լինելու, որովհետև մեր ինքնությունից Ցեղասպանության ջնջումը նա իր համար հռչակել է կարևոր ուղղություն։ Երբ Ցեղասպանության միջազգային ճանաչման հարցը հանվում է ՀՀ արտաքին քաղաքականության օրակարգից, դա ուղիղ նշանակում է, որ ՀՀ գործող վարչախումբը համաձայնություն է տալիս հայ ժողովրդի հանդեպ Ցեղասպանության կրկնման»,- ասաց նա։
«Հայաքվե» նախաձեռնության համակարգող Ավետիք Չալաբյանն իր հերթին հավելեց, որ ՀՀ իշխանություններն իրենց ոճով փորձում են գնդակը հանրային դաշտ գլորել, ապա տեսնելով հանրային կոշտ արձագանքը՝ փորձել հետ սողալ, մեղմացնել խոսույթը։
«Մենք բոլոր հնարավոր միջոցներով պետք է պայքարենք սողացող թուրքացման դեմ։ Ի վերջո՝ Նիկոլ Փաշինյանը ստիպված կլինի ներողություն խնդրել, երբ կանգնած կլինի դատարանում, և իր առջև դրված կլինեն բազմաթիվ մեղադրանքներ»,- ամփոփեց Չալաբյանը։
