Այո, մամուլում շրջանառվում է, որ սահմանադրական կարգը տապալվում է, այսօր՝ լրագրողների հետ զրույցում ասաց արդարադատության նախարար Սրբուհի Գալյանը՝ անդրադառնալով ՔՊ-ականների և անձամբ Նիկոլ Փաշինյանի՝ եկեղեցու դեմ արշավի վերաբերյալ հարցերին։
Նախարարը նշեց, որ պետք է փոքրիկ դասախոսություն անցկացնի «սահամանադրական կարգի տապալում» հասկացության առնչությամբ։
«Դա նշանակում է, որ որևէ անձ պետք է փաստացի դադարեցնի Սահմանադրության կոնկրետ հոդվածների գործողությունները, իսկ այդ կոնկրետ հոդվածները վերաբերում են հետևյալին՝ ՀՀ ինքնիշխանությանը, այն մասին է, որ մեր երկիրը ժողովրդավարական, ինքնաիշխան, սոցիալական, իրավական պետություն է, խոսքն այն մասին է, որ մեր երկրում մարդը բարձրագույն արժեք է, խոսքն այն մասին է, մեր երկրում գործում է իշխանությունների տարանջատման սկզբունքը, մեր երկրում ընտրությունները կայանում են այնպես, ինչպես կայանում են։ Եթե չեմ սխալվում, Սահմանադրության 1-7-րդ հոդվածների մասին է խոսքը։ Այդ նորմերի գործողության փաստացի դադարումն է նշանակում սահմանադրական կարգի տապալում»։
Լրագրողներից մեկի հարցին՝ ՔՊ-ականների համար և՞ս դասախոսություններ է կարդում, Գալյանը պատասխանեց.
«Արդեն որերորդ անգամ է ես մեմերի կերպար եմ դառնում ձեր պատճառով, որովհետև ստիպված եմ անընդհատ ինչ-որ տարօրինակ ռեակցիաներ տալ ձեր՝ իրականում շատ տարօրինակ և անհարգալից պահվածքին։ Եթե հրավիրում եք հարցազրույցի, բարի եղեք, լսել այն, ինչ ես եմ ասում։
Սահմանադրությամբ, երբ որևէ մարմնի, անձի մասին, այդ թվում և իրավաբանական, ընդ որում եկեղեցին իրավաբանական անձ է, նշում է արված, դրա մասին խոսելը երբևէ, որևէ պարագայում չի կարող մեկնաբանվել որպես սահմանադրական կարգի տապալում»։
Մեկ այլ հարցի՝ Նիկոլ Փաշինյանն արդյոք չի գերազանցում իր լիազորությունները, հակասահմանադրական քայլ չի՞ անում՝ խառնվելով Վեհափառի կուսակրոնության ուխտի թեմային՝ նախարարը հարցին հարցով պատասխանեց.
«Ի՞նչ է նշանակում հակասահմանադրական գործողություն անել։ Եկեղեցու գործերին միջամտելու իրավունք ո՞վ ունի։ Եկեղեցին սահմանադրական մարմի՞ն է, թե ոչ…»։
Այնուհետև նա ընդհատեց հարցազրույցն այն պատճառով, որ լրագրողները իրեն հարցն են տալիս, թեև ինքը դեռ նախորդ հարցի պատասխանը չի ավարտել։
«Դուք ինձ չեք հարգում»,- ասաց Գալյանը։
Լրագրողների դիտարկմանը, որ երբևէ հարցերին սպառիչ պատասխաններ չի տալիս, նախարարն ասաց. «Անհնար է, ժողովուրդ, անկեղծ, ամեն անգամ… ձեզ բոլորին հրավիրում եմ արդարադատության նախարարություն լրագրողական, իրավական տեսանկյունից, էթիկայի և իրավական կրթության հետ կապված երկխոսություն ունենալու»։
Լրագրողները հարցրեցին՝ այդ դեպքում «դոմփել»-ը ո՞ր էթիկայի մեջ է մտնում, կամ՝ «վարչապետը երբ որ այդ բառապաշարով է խոսում, գուցե իրե՞ն հրավիրեք էթիկայի դասախոսության»։
