ԱՄՆ ներքին գործերի նախարարությունը հայտարարել է Մեքսիկական ծոցն Ամերիկյանի վերանվանելու մասին՝ ԱՄՆ նախագահ Դոնալդ Թրամփի հրամանագրի համաձայն։
Նաեւ տեղեկացվել է, որ Հյուսիսային Ամերիկայի ամենաբարձր գագաթը նորից կկրի Մակքինլիի անունը։
«Այս փոփոխությունները հաստատում են ազգի հանձնառությունը՝ պահպանելու Միացյալ Նահանգների նշանավոր ժառանգությունը եւ երաշխավորելու, որ ամերիկացիների ապագա սերունդները կհարգեն ազգի հերոսների ժառանգությունը եւ պատմական արժեքները»,- նշվել է ներքին գործերի նախարարության հայտարարությունում:
ԱՄՆ աշխարհագրական անունների խորհուրդը, որը ղեկավարում է ներքին գործերի նախարարությունը, աշխատում է Աշխարհագրական անունների տեղեկատվական համակարգում պաշտոնական դաշնային անվանացանկը թարմացնելու ուղղությամբ՝ արտացոլելով այս փոփոխությունները, որոնք անմիջապես կգործեն դաշնային կիրառման համար:
«Ամերիկյան ծոցը, որը նախկինում հայտնի էր որպես Մեքսիկական ծոց, երկրի պատմության եւ տնտեսության կարեւորագույն արժեքներից մեկն է: Ձգվելով ավելի քան 1 700 մղոն ԱՄՆ առափնյա գծով եւ ընդգրկելով մոտ 160 մլն ակր՝ ծոցը դարձել է ամերիկյան առեւտրի, էներգիայի արտադրության եւ ծովային արդյունաբերության կարեւորագույն զարկերակը»,- նշվել է գերատեսչության պարզաբանման մեջ:
Նաեւ ընդգծվել է, որ 1917թ. երկիրը պաշտոնապես հարգել է նախագահ Մակքինլիի հիշատակը՝ նրա անունով կոչելով Հյուսիսային Ամերիկայի ամենաբարձր գագաթը։
«Մոտ մեկ դար անց, սակայն, նախագահ Օբամայի վարչակազմը 2015թ. հեռացրել է Մակքինլիի անունը դաշնային անվանացանկից, ինչը վիրավորանք էր նախագահ Մակքինլիի կյանքի, ձեռքբերումների եւ զոհաբերությունների համար: Գագաթն իր պատմական անվանը վերադարձնելու որոշումը նախագահ Մակքինլիի մնայուն ժառանգության նշանակալի ճանաչումն է»,- նշվել ԱՄՆ ՆԳՆ հայտարարությունում:
