Կեղծավորության և այսպես ասած արհեստականության մեջ ապրելը շատ սխալ է. որոշ դեպքերում որոշ ճշմարտություններ պետք է բարձրաձայնվեն, և այդ ճշմարտությունների հետևից նաև պետք է գնալ: Լրագրողների հետ զրույցում այսօր այս մասին ասաց Երևանի քաղաքապետ Տիգրան Ավինյանը՝ պատասխանելով հարցին՝ ի՞նչ դիրքորոշում ունի ներքաղաքական իրադարձությունների վերաբերյալ՝ մասնավորապես Վեհափառին հեռացնելու հարցի առնչությամբ:
«Ինչի վրա շատ երկար ժամանակ աչք է փակվում՝ որոշ հանգամանքներից ելնելով, վաղ թե ուշ այդ արհեստականությանն ու կեղծավորությանը, այո՛, պետք է վերջ տալ»,- ասաց նա:
Ճշտող հարցին՝ միանալո՞ւ է Փաշինյանի առաջնորդած խմբին, որը պետք է Վեհափառին հեռացնի Վեհարանից, Ավինյանը պատասխանեց.
«Ես կարծում եմ՝ ամեն մարդ իր տեղում իր գործը պետք է կատարի»:
Հարցին՝ Սամվել Կարապետյանի պաստառներն ինչո՞ւ են հեռացնում, դա քաղաքական որոշո՞ւմ է, քաղաքապետը պատասխանեց՝ դա ընդամենն օրինականության պահպանման խնդիր է։
«Բայց, այնուամենայնիվ, որոշ առումով, հասկանալով նաև ընտանիքի դրությունը՝ կան տեղեր, որ առհասարակ չենք մոտեցել: Բայց ընդհանուր առմամբ, հետևյալն ասեմ՝ այդ գործընթացը, որ իրականացվել է,դա ոչ այդքան օրինական գործընթաց է։ Քարոզչական պաստառներ իրականացվել են քարոզարշավի շրջանակներում»:
