Քաղտեխնոլոգ Կարեն Քոչարյանի կարծիքով՝ բոլոր այն ուժերը, որոնք իրենց այս պահին դիրքավորում են՝ որպես ընդդիմություն, պետք է կնքեն միմյանց դեմ չաշխատելու և որևէ պարագայում պառլամենտ անցնելու դեպքում գործող իշխանության հետ կոալիցիա չկազմելու վերաբերյալ համաձայնագիր:
168TV-ի «Ռեվյու» հաղորդման ընթացքում նա նշեց, որ թեև Նիկոլ Փաշինյանը մեջբերում է անում Ավետարանից, բայց նրա գործողությունները նեռի ավետարանի արժեքների վրա են հիմնված. «Այդքան ատելություն, սուտ, կեղտ, և այս շարքը կարելի է շարունակել, կարող էր միայն նեռը տարածել՝ այս կարճ ժամանակահատվածում»:
Հիշեցնենք, որ Նիկոլ Փաշինյանն ԱԺ-ում ունեցած իր ելույթում իրեն ու իր թիմին գովելու և բազմաթիվ մանիպուլյացիաներ անելու ընթացքում դարձյալ մեջբերում արեց Ավետարանից, և նշեց, որ «ՀՀ կառավարությունն ամեն օր այցելում է իր բանտարկյալին, երբ նրանք սոված են՝ նրանց հաց է տալիս, երբ նրանք ծարավ են՝ նրանց ջուր է տալիս»:
Կարեն Քոչարյանն ընդգծեց՝ ընտրությունները լինելու են ամենակեղտոտը և ամենավտանգավորը՝ վերջին 30 տարիներին անցկացված ընտրություններից՝ թե՛ նախընտրական արշավների առումով, թե հետընտրական զարգացումներով. «Երբևիցե Հայաստանում անցկացված ընտրությունների խաղադրույքը չի եղել կյանքը. Այս ընտրությունների ճակատին գրված է՝ կյանքից ավելի թանկ: Ամեն գնով կփորձեն պահել իշխանությունը՝ ոչ մի բանի առաջ չկանգնելով: Այսքան սուտ, որ ասվում է՝ առանց ամաչելու, մարդկանց աչքերի մեջ նայելով… ընդ որում՝ ամենաշատը խղճում եմ այն մարդկանց, որոնք մինչ օրս անվերապահորեն հավատում են Նիկոլ Փաշինյանին: Ես հասկանում եմ՝ մարդկանց կրթական ցենզը չի բավարարում, որ փորձեն վերլուծել և հասկանալ՝ ինչ է ասում և ինչեր է ասել: Նրա ասած ամեն ինչը սուտ էր»:
Մանրամասները՝ 168TV-ի տեսանյութում
