Թուրքիայի պետական TRT գործակալությունը հայտնում է, որ Բախտիար Էրսայը ստացել էր թուրքական բանակի բարձրագույն զինվորական կոչում` բանակի գեներալ։ Այս առիթով քաղաքագետ Արա Պողոսյանը վերլուծել է թուրք-ադրբեջանական ռազմական համագործակցության հեռանկարները և հավանական վերջնարդյունքը.
«Ադրբեջանի պաշտպանության նախարարի խորհրդական, գեներալ-լեյտենանտ Բախտիար Էրսայը ստացել է բանակի գեներալի կոչում։ Սա Թուրքիայի ցամաքային զորքերում բարձրագույն զինվորական կոչումն է։
2022 թվականին Բախտիյար Էրսայը ստացել էր գեներալ-լեյտենանտի կոչում և նշանակվել Ադրբեջանի պաշտպանության նախարար, բանակի գեներալ Զաքիր Հասանովի խորհրդական։
Հիշեցնենք, որ Թուրքիան և Ադրբեջանը ակտիվորեն զարգացնում են համագործակցությունը ռազմատեխնիկական ոլորտում։ Ադրբեջանի ՊՆ տվյալներով՝ միայն 2022 թվականին երկու երկրների միջև անցկացվել է ավելի քան 20 համատեղ զորավարժություն։
Ադրբեջանի պաշտպանության նախարար Զաքիր Հասանովը հայտարարել է, որ Ադրբեջանի զինված ուժերը սերտ համագործակցում են Թուրքիայի զինված ուժերի հետ, իսկ երկու բանակների ինտեգրումը բարձր մակարդակի վրա է բոլոր ոլորտներում։
Ավելի վաղ Թուրքիայի խորհրդարանի պաշտպանության հարցերի հանձնաժողովի ղեկավար, Թուրքիայի պաշտպանության նախկին նախարար Հուլուսի Աքարը հայտարարել էր, որ Թուրքիան և Ադրբեջանը շարունակում են միացյալ բանակային օրգանիզմի ձևավորման գործընթացը։
«Ադրբեջանի և Թուրքիայի զինված ուժերը դառնում են միավորված կառուցվածք և կատարելու են երկու պետությունների առջև կանգնած ընդհանուր խնդիրներն ու նպատակները», – նշել է նա. գրում է TRT haber-ը։
Հ.Գ.
Այսինքն՝ դժվար է խոսել անկախ Ադրբեջանի մասին, Ադրբեջանը հետզհետե դառնում է Թուրքիայի ո’չ միայն քաղաքական կցորդը, այլև էներգետիկ, անվտանգային և այլն։
