Ես երբեք վատ չեմ զգում իմ քաղաքական անցյալի համար. ՔՊ-ական եղել եմ և չեմ բացառում, որ մի օր, երբ այս պաշտոնում չեմ լինի, միգուցե կվերադառնամ ՔՊ, լրագրողների հետ ճեպազրույցի ժամանակ այսօր նշեց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։
Ճշտող հարցին՝ չի՞ ստացվում, որ միայն թղթի վրա է, որ ՔՊ-ական չէ, Մեսրոպյանը բացասական պատասխան տվեց։
«Ո՛չ, չի ստացվում, որովհետև ես ունեմ անձնագրով սահմանված պարտականություններ, իրավունքներ և բացառապես մնում եմ այդ պաշտոնի անձնագրով սահմանված իրավունքների մեջ։
Նման երևույթներ ինձանից առաջ էլ են եղել, մենք հենց հիմա ունենք հանձնաժողովի անդամ, իմ կողմից շատ հարգանքի արժանի անձնավորություն՝ Արա Նռանյանը, որ ոչ վաղ անցյալում և իր ամբողջ կենսագրության ընթացքում ՀՅԴ վառ ներկայացուցիչ է եղել։ Հիմա դուք կարո՞ղ եք պնդել, որ Նռանյանը այս ընթացքում հանձնաժողովում քաղաքական դրսևորումներ ունի։
Կա պետության լիազոր մարմնի կողմից ներկայացված հայտ և այդ հայտում բարձրացված խնդիրներ, հիմնավոր կասկածներ։ Ավելի լավ է մենք այսօր հասկանանք այդ կասկածները, այդ հարցերը, կյանքի իրավունք ունեն, թե չունեն։ Ես ասում եմ, որ քաղաքական պրոցեսներում ներգրավված չեմ, և այդ սխալ պնդումները խնդրում եմ մի շարունակեք»,–ասաց նա։
