ՀՀ ԱԺ աշխատակազմի ղեկավար-գլխավոր քարտուղար Վահան Նարիբեկյանը հոկտեմբերի 20-ին Ստրասբուրգում մասնակցել է Եվրոպայի խորհրդի խորհրդարանական վեհաժողովի անդամ պետությունների խորհրդարանների գլխավոր քարտուղարների հանդիպմանը:
ԱԺ-ից NEWS.am-ին հայտնում են, որ հանդիպման ընթացքում քննարկվել են խորհրդարանների աշխատակազմերի առջեւ ծառացած խնդիրների, դրանց լուծումների, արդի մարտահրավերների պայմաններում աշխատակազմերի բնականոն գործունեության ապահովմանը վերաբերող հարցեր:
Առանձնահատուկ ուշադրության է արժանացել «Կանաչ խորհրդարանների» հայեցակարգին` էներգետիկ ճգնաժամի, կլիմայական փոփոխությունների արդյունքում խորհրդարանների վարչական շենքերի հնարավորինս արդյունավետ կառավարման, պատգամավորների եւ աշխատակազմի աշխատակիցների բնականոն գործունեության ապահովման եւ հնարավոր խնայողությունների ապահովման տեսանկյունից:
ԱԺ աշխատակազմի ղեկավար-գլխավոր քարտուղար Վահան Նարիբեկյանը հանդիպումներ է ունեցել մի շարք երկրների խորհրդարանների գլխավոր քարտուղարների հետ: Քննարկվել է երկկողմ համագործակցությունը Ֆրանսիայի, Բելգիայի եւ մի շարք այլ երկրների խորհդարանների հետ:
