Արցախից տեղահանվածները Կառավարության շենքի դիմաց բողոքի ակցիա են կազմակերպել։ Նրանք ապրելու պայմաններ չունեն, տանիք չունեն, կենցաղային նվազագույն կարիքները հոգալ չեն կարողանում։ Ընտանիքներ կան, որոնց երեխաները բուհեր են ընդունվել, մի քանի տարի սովորել, սակայն վարձի պատճառով դուրս են մնացել ու թողել ուսումը։ Տասնամյակներ առաջ Հայաստանի տարբեր մարզերից Արցախ տեղափոխված, այնտեղ տունուտեղ դրած, ապրուստ ստեղծած մարդիկ վերադարձել են Հայաստան, սակայն նոր բնակավայրերում ինտեգրվել չեն կարողանում, որովհետև բազմաթիվ խնդիրների են բախվել՝ բնակարան, աշխատանք չունեն։
Նրանք ՀՀ կառավարությունից պահանջում են համապատասխան փոխհատուցում, որ կարողանան գոնե բնակարան գնել:
Բերձորցիները հավաստիացնում են, որ սերտիֆիկատներ տուն գնելու համար տալիս են, բայց այդ գումարով հնարավոր չէ որևէ բան գնել:
«Ով վերցրել է սերտիֆիկատը, տուն են գտել, եկել են, գնահատել են, բայց տված գումարի կեսի չափով, մնացածը թե բնակիչը ոնց պետք է մուծի, Աստված գիտի: Բանկը գալիս է գնահատելու, 10 միլիոնը լրիվ չի տալիս, գնահատում է այնքան, որքան բանկին ձեռք է տալիս»,- ասում են Արցախից տեղահանվածները։
Արցախից տեղահանվածները վրդովված են. Երևանի կենտրոնում տոնածառ է դրված, Կառավարությունում վերանորոգման աշխատանքներ են, քաղաքը լույսերի մեջ ողողված է, ո՞ւմ համար, եթե ընտանիքներ կան, որտեղ սովորական լույս չի վառվում, որտեղ օրվա հացի կարոտ են։
