Սակայն որևէ դրոն ձեզ չի կարող տալ ձեր դեմ ընդվզողների ոչ թե քանակական, այլ մտավոր և մոտիվացիոն պատկերը. թյուրքագետը՝ իշխանություններին

Ներկայումս Հայաստանի անվտանգության համար բացի արտաքին սպառնալիքներից, առկա են նաև ներքին սպառնալիքներ, որոնց մեջ առաջնային և վտանգավոր են ներհայաստանյան ատելությունը, ինչպես նաև տգիտությունը. գրել է թյուրքագետ ռուբեն Մելքոնյանը։
Նա ավելացրել է.
Ստորև ներկայացնում եմ իմ ոչ թուրքագիտական հոդվածը ատելության, դրա գեներացման, մեղավորների, տգիտության և դրանց քարոզողների, ինչպես նաև այդ ամենը մեկ րոպե առաջ կասեցնելու անհրաժեշտության մասին:
«Պետք է ևս մեկ անգամ այս պահին դեռևս իշխող ուժին փաստեմ հետևյալը.
– Հայաստանը ներքաշելով ատելության ճահիճը՝ դուք հասարակության մի մասի մոտ արթնացրեցիք ամենաստոր, որևէ տրամաբանության մեջ չտեղավորվող, բարոյականության սահմաններից անասելի հեռու զգայարաններ,
– Դուք մարդուն վիրավորելը դարձրեցիք ամենահեշտ գործը Հայաստանում,
– Դուք հեռացաք հոգևորականությունից և թիրախավորելով նրանց՝ սկսած Վեհափառից մինչև քահանա, նույնիսկ Հայոց ցեղասպանության հուշարձան ապրիլի 24-ին հայոց հոգևոր դասի հետ չեք գնում,
– Դուք զրկվել եք իրատեսությունից, կտրվել իրականությունից, դուք ինքնախաբեության ռեժիմում եք և այդ ռեժիմով եք կառավարում երկիրը,
– Դուք շատ լավ գիտեք, որ ձեր իսկ շարքերում թևածում է բռնապետության ոգին, դուք շատ լավ գիտեք, որ անձի պաշտամունքի կերտողներ եք, դուք շատ լավ գիտեք, որ վաղուց հրաժեշտ եք տվել ձեր ներթիմային բազմակարծությանը,
– Դուք առաջնորդվում եք «դրոնային մտածողությամբ», երբ ֆիքսում եք հանրահավաքի մասնակիցների թիվը և ինքնասփոփանքի մեջ ընկնում, որ դա դեռ չի հասել կրիտիկական ծավալների: Սակայն որևէ դրոն ձեզ չի կարող տալ ձեր դեմ ընդվզողների ոչ թե քանակական, այլ մտավոր և մոտիվացիոն պատկերը»։