Թուրքիայի նախագահ Ռեջեփ Թայիփ Էրդողանն այսօր՝ չորեքշաբթի, Սոչիում հանդիպել է իր ռուս գործընկեր Վլադիմիր Պուտինի հետ:
«Երբեմն ռուս-թուրքական բանակցությունները հեշտ չեն, բայց արդյունքը միշտ դրական է», – ասել է Պուտինը՝ անդրադառնալով Ռուսաստան-Թուրքիա հարաբերությունների դրական աճին:
Նա անդրադարձել է որոշ եվրոպական և ամերիկյան երկրների բացասական գործողություններին «Հյուսիսային հոսք 2» գազատարի դեմ՝ նշելով. «Եվրոպական էներգետիկ շուկայում անկայունություն կա, սակայն Թուրքիան «Թուրքական հոսք» խողովակաշարի գործարկումից հետո իրեն վստահ է զգում»:
«Ռուսաստանը և Թուրքիան հաջողությամբ համագործակցում են միջազգային հարցերում, ներառյալ Լիբիան, Սիրիան և Հարավային Կովկասը », – ասաց նա:
«Լեռնային Ղարաբաղի հակամարտության հարցում Ռուսաստանի համագործակցությունը շատ կարևոր է ինչպես հրադադարի ռեժիմի շարունակման, այնպես էլ ապագայում կայուն խաղաղության հաստատման համար», – ասել է Պուտինը՝ նշելով, որ Լեռնային Ղարաբաղի իրավիճակի վրա Թուրքիայի ազդեցությունը կնպաստի տարածաշրջանի կայունացմանը:
«Մենք կարծում ենք, որ Ռուսաստանի հետ հարաբերությունների շարունակական ամրապնդումը մեզ մեծ օգուտ է բերում: Անկարայի եւ Մոսկվայի տնտեսական, քաղաքական եւ ռազմական հարաբերությունները մեծ առաջընթացի են ականատես լինում», – ասել է Էրդողանը Պուտինի հետ հանդիպման ժամանակ:
«Սիրիայում խաղաղությունն անմիջականորեն կապված է ռուս-թուրքական հարաբերությունների հետ», – ասել է Էրդողանը՝ նկարագրելով Թուրքիայի և Ռուսաստանի դերը Արևմտյան Ասիայի տարածաշրջանում:
Թուրքիայի նախագահը նաեւ ասել է, որ իր ռուս գործընկերոջ հետ բանակցությունների ընթացքում քննարկել է երկու երկրների ռազմատեխնիկական համագործակցության զարգացումը:
Ավելի վաղ Կրեմլի խոսնակ Դմիտրի Պեսկովը, անդրադառնալով Թուրքիայի նախագահի այցին Սոչի, ասել էր, որ ինքը եւ Ռուսաստանի նախագահը պետք է քննարկեն Սիրիան, Աֆղանստանը եւ Լիբիան:
©️ #ՓԱԿԱԳԻԾ
