Փաստն այն է, որ 2017 թվականի համեմատ՝ 2025-ի արձանագրված արդյունքներով գիտության ֆինանսավորումն ավելացրել ենք շուրջ 2,8 անգամ՝ 185 տոկոսով։ Նաև գիտության ոլորտում աշխատավարձերի էական բարձրացում է տեղի ունեցել՝ ընդհուպ մինչև 300 տոկոս և ավելի, Գիտությունների ազգային ակադեմիայում այսօր ունեցած ելույթում հայտարարեց ՀՀ վարչապետ Նիկոլ Փաշինյանը։
Նա ԳԱԱ նախագահին շնորհակալություն հայտնեց, որ վերջինս բարձրաձայնում է որակավորման հետ կապված խնդիրների մասին։
«Պիտի խոստովանեմ, որ ելույթներում ականջս ծակում է, երբ ասում են, որ կառավարությունն աջակցում է գիտությանը։ Որովհետև այստեղ մի տեսակ դիստանցիա է ստեղծվում կառավարության և գիտության միջև։ Մենք գիտությանը չենք աջակցում, գիտության զարգացումը մեր քաղաքականությունն է, այսինքն՝ մենք չենք տեսնում, որ կա պետություն այստեղ և ինչ-որ հեռավարության վրա գոյություն ունի գիտություն, որին մենք պետք է աջակցենք։
Գիտության զարգացումը մեր քաղաքականությունն է, և դա ունի կոնկրետ և շոշափելի պատճառ. մենք չենք պատկերացնում պետության զարգացումն առանց գիտության զարգացման։ Մյուս կողմից մենք չենք պատկերացնում գիտության զարգացումն առանց կրթության զարգացման, բայց նաև ուզում եմ ասել, որ պետության զարգացում ասելով՝ առաջին հերթին նկատի ունենք տնտեսության զարգացումը։
Գիտությունն ինքը տնտեսություն է, և գիտությանը տրվող միջոցների ճիշտ կառավարումը շատ կարևոր գործիք է, որը լուծում է բազմաթիվ խնդիրներ»,- ասաց Նիկոլ Փաշինյանը։
ՀՀ վարչապետը նշեց՝ ինքը հիշում է, թե ինչ տառապանքների արդյունքում հնարավոր դարձավ Ֆիզիկայի ինստիտուտում իզոտոպերի արտադրությունը, որն այժմ կիրառվում է առողջապահության ոլորտում։
«Մեր պատկերացումն է, որ գիտությունը և գիտական հանրությունը քաղաքականությունների մշակմանը մասնակցության ավելի մեծ ծավալ և ներկայություն պետք է ունենան։ Վերջին տարիների մեր քաղաքականություններն ուղիղ կապ են ունեցել մեր պատմության ընթերցման և վերընթերցման հետ, և երբեմն սկզբնական շրջանում՝ 20-22 թվականներին, ինքս իմ մեջ որոշակի բանավեճեր էի ունենում մեր պատմագիտական հանրության հետ։
Բայց մյուս կողմից իքս պահի արձանագրեցի մի շատ կարևոր բան, որ ԳԱԱ հրատարակած պատմության հատորյակներում շատ բարեխղճորեն արձանագրված են փաստերը, և երբեմն կան հետևություններ, որոնց հետ կարելի է համաձայնվել, երբեմն էլ չհամաձայնել։
Պատմությունից հետևություն անելը քաղաքական գործիչների խնդիրն է, և մենք երբեմն այդտեղ էլ ենք սխալ մոտեցումներ ցուցաբերում՝ ոչ միայն պատմության շարադրումը և մատուցումն արտապատվիրակելով պատմաբաններին, այլև՝ հետևություններ անելը, որը գիտությունը դնում է ոչ այնքան ճիշտ դիրքում, որովհետև առաջին հերթին դա քաղաքական առաջնորդության խնդիրն է։ Ես վստահաբար կարող եմ ասել, որ վերջին տարիներին մեր՝ երբեմն վիճահարույց քաղաքականությունները բխում են ուղիղ մեր պատմության ուսումնասիրությունից և վերընթերցումից»,- ասաց Փաշինյանը։
Նա միաժամանակ անդրադարձավ դպրոցներ իր կատարած այցերին՝ ընդգծելով, որ շատ նորակառույց դպրեցներում 3D տպիչ սարքերն ամիսներով դրված են, սակայն չեն օգտագործվում։ Պատճառն, ըստ Փաշինյանի, այն է, որ մարդիկ այդ սարքերին չեն տիրապետում։
«Դպրոցներս այցելելիս նկատում եմ, որ բազմաթիվ լաբորատոր սարքեր արկղից դուրս են գալիս իմ այցի առիթով՝ չնայած դպրոցն ամիսներով գործում է։ Մենք հիմա մարզադահլիճներում ցնցուղներ ենք ներառում, որ երեխաները սպորտով զբաղվելուց հետո օգտագործեն։ Տասնյակ դպրոցներում այդ ցնցուղները և լաբորատոր սարքերը կամ շատ հաճախ չեն օգտագործվում կամ բավարար չափով չեն օգտագործվում»,- ասաց Նիկոլ Փաշինյանը։
