Մենք պետք է սխալներից դասեր քաղենք և հետևություններ անենք, որովհետև դա մի ճանապարհ է, որը հայ ժողովրդին դատապարտում է նահատակի և գոյատևողի ճակատագրի, այսօր հայտարարեց Նիկոլ Փաշինյանը՝ անդրադառնալով արցախահայության վերադարձի թեմային։
«Մեր կառավարության և իմ առաքելությունը համարում եմ ժողովրդին նահատակացման տրամաբանությունից դուրս բերելը, և մենք, այո՛, այսօր հասել ենք դրան բազմաթիվ զոհերի ու զոհողությունների գնով»,- ասաց նա։
Ըստ Փաշինյանի՝ եթե հիմա ասեն, որ որդեգրում են արցախցիների վերադարձի օրակարգը՝ Արցախի ժողովուրդը դրանից շահելո՞ւ է։
«Դա նշանակում է նրանց դատապարտել հավիտյան պանդուխտի կարգավիճակի, որ չիմանան՝ որտեղ են ապրելու, կա՞ հասցե, թե՞ չկա։ Ես ասում եմ՝ կա՛, այդ հասցեն Հայաստանի Հանրապետությունն է՝ իր միջազգայնորեն ճանաչված ինքնիշխան տարածքով»,- նշեց նա։
Նիկոլ Փաշինյանը հայտարարեց՝ ուղիղ է ասում՝ հրաժարվում են Ղարաբաղ վերադարձի ճանապարհից։
«Հազիվ էդ գործից ես և մենք ազատվել ենք։ մենք հրաժարվում ենք այդ ճանապարհից։ Մենք ասում ենք՝ Ղարաբաղի սիրելի՛ քույրեր ու եղբայրներ, պետք է տնավորվեք Հայաստանում, ստանաք ՀՀ քաղաքացիություն»,- ընդգծեց նա։
