Ով գնալու է, թող գնա, տեսնենք՝ տակը քանի հոգի է մնում. Սաղաթելյանը՝ Աննա Հակոբյանին վարդերով դիմավորող Փարամազյանի մասին

Ափսոսում եմ, շատ եմ ափսոսում, որովհետև Մանվել Փարամազյանն այս իշխանության դեմ պայքարել է, այդ պայքարի հետևանքով ապօրինի ազատազրկվել և քանի ամիս բանտարկության մեջ է  գտնվել։ Այն, ինչ կատարվել է  Քաջարանում, ինձ համար անընդունելի է, ինչ–որ տեղ՝ նաև անհասկանալի․ այսօր՝ հուլիսի 11-ին, լրագրողների հետ հանդիպման ժամանակ ասաց ՀՅԴ Հայաստանի ԳՄ ներկայացուցիչ, «Դիմադրություն» շարժման համակարգող Իշխան Սաղաթելյանը՝ պատասխանելով հարցին, թե ի՞նչ կարծիք ունի Քաջարանի քաղաքապետի՝ Աննա Հակոբյանին վարդերով դիմավորելու վերաբերյալ։

«Բայց գիտեք՝ յուրաքանչյուրն ինքն է  որոշում իր ընթացքը, իր գործությունեությունը և իր արածի ու քայլերի համար տալիս է բացատրություն ու կրում պատասխանատվություն։  Անկեղծ, ես ափսոսում եմ, ափսոսում, որովհետև ինքն այն մարդկանցից էր, որը դուրս էր եկել պայքարի և այդ պայքարի համար ազատությունից զրկվել էր։ Ի՞նչ է փոխվել, ի՞նչ է կատարվել, մանրամասներին տեղյակ չեմ: Մի բան վստահեցնում եմ՝ մենք ասել ենք, որ հեշտ չի լինելու, իրոք, մարդիկ են լինելու, որ չեն դիմանալու, որ ընտրություն են անելու, բայց դա որևէ կերպ չի ազդելու մեր շարժման ընթացքի վրա»,– ասաց Իշխան Սաղաթելյանը։ 

Նա չբացառեց, որ նման դեպքեր էլի կլինեն, բայց բացառում է, որ նման դեպքերը կարող են մեծ ազդեցություն ունենալ «Դիմադրություն» շարժման վրա։ «Ով գնալու է, թող գնա, տեսնենք տակը քանի հոգի է մնում, որ մենք էլ իմանանք՝  ուր ենք գնում», — ասաց ընդդիմադիր պատգամավորը:

Իշխան Սաղաթելյանն ասաց, որ վստահ է` շատ լուրջ ճնշում է գործադրվել Փարամազյանի նկատմամբ. «Այլ պարագայում չէր անի»: