Կուսակցությունների ֆինանսական թափանցիկությանն առնչվող նոր կարգավորումներն ընդունվել են դեռ 2025 թվականին։ Այս մասին այսօր հրավիրված մամուլի ասուլիսի ժամանակ հիշեցրեց ՀՀ արդարադատության նախարար Սրբուհի Գալյանը։
Պատասխանելով հարցին՝ արդյոք ընտրություններից առաջ կարող է ընդունվել մի օրենք, որն իշխանություններին թույլ կտա ընդդիմադիր որոշ ուժերի արգելել մասնակցել ընտրություններին՝ նախարարը նշեց՝ այդ մասով ընդունվել են նոր կարգավորումներ, որոնք նախատեսում են մեկ միասնական բանկային հաշիվ, կուսակցությանը կամ հիմնադրամին փոխանցումների վերին շեմի սահմանում և ֆինանսական հաշվետվությունների ներկայացման պահանջ և այլն։ Սակայն մնացել են որոշակի բացեր, որոնց հետ կապված մշակված փաթեթ ունեն։
«Բայց որոշ երևույթներից խուսափելու համար այս պահին գուցե նպատակահարմար չէ խաղի նոր կանոններ սահմանել։ Այս պահին դեռևս որոշում չունենք՝ փոփոխություն անելու ենք, թե ոչ։ Ամենայն հավանականությամբ չենք անի», -ասաց Սրբուհի Գալյանը։
Նրա խոսքով՝ այստեղ կա մեկ այլ խնդիր. շարժումների և նախաձեռնությունների ֆինանսավորման թափանցիկության հարցերը կարգավորված չեն, և դրանք կարգավորելը բարդ է։ Ըստ Գալյանի՝ հասարակությունն ինքը պետք է շահագրգռված լինի իմանալու, թե որ ուժերն են ֆինանսավորում այս կամ այն շարժումը ։
Այն հարցին, թե արդյոք ինքը՝ Գալյանը, նվիրատվություններ կատարել է «ՔՊ»-ին, նախարարը հայտարարել է, որ չի արել, սակայն ցուցակում իր մասնակցության համար նա պետք է վճարում իրականացնի։
