Վերաքննիչ դատարանը հաշվի է առել երկու կարևորագույն ընթացակարգային խախտում. դրանցից առաջինն այն է,որ փակ-գաղտնի քվեարկության համար նախատեսված սենյակ մուտք է գործել օտար անձ՝ հոգաբարձուների խորհրդի նախագահը, և երկրորդ, որ ըստ ռեկտորի ընտրության կարգի՝ արձանագրությունը ստորագրել է ընդամենը երկու հոգի։, Այս մասին «Պոլիտեխնիկի ռեկտորի ընտրությունների արդյունքները դատարանն անվավեր է ճանաչել քվեարկությունից չորս տարի անց» թեմայով քննարկման ժամանակ այսօր ասաց համալսարանի նախկին դասախոս Դավիթ Ղազարյանը։
«Այս ամենը շատ խոր արմատներ ունի, և եթե հետ գնանք, կարող ենք փաստել, որ ընտրությունները բազմաթիվ խախտումներով են անցել։ Մինչև ընտրությունները սկսելն արդեն իսկ խախտումներ կային։ Այս ամենը բարձրաձայնվել է մեր կողմից։ Նպատակ կար ռեկտորի ընտրություններին նախնական պայմանավորվածություններն ավարտին հասցնելու։ Ափալ-թափալ պետք էր ավարտին հասցնել կոնկրետ մարդու ռեկտոր ընտրելու գործընթացը»,- ասաց Դավիթ Ղազարյանը։
Քննարկմանը ներկա Հայաստանի ազգային պոլիտեխնիկական համալսարանի «Գյուղատնտեսական թունաքիմիկատների ստացում և որակի վերահսկում» գիտահետազոտական լաբորատորիայի նախկին ղեկավար Արամ Միքայելյանն իր հերթին հավելեց, որ պետք է խիստ կանոնակարգային խախտում համարել այն, որ բուհի զարգացման հայեցակարգերը պետք է հասանելի լինեին հոգաբարձուների խորհրդի անդամներին, սակայն այդ կետն ամբողջությամբ անտեսվել է։
«Հոգաբարձուների խորհրդի անդամները որևէ հնարավորություն չեն ունեցել բուհի զարգացման հայեցակարգին նախօրոք ծանոթանալու»,- ասաց նա։
Դավիթ Ղազարյանը, շարունակելով իրավիճակի նկարագրությունը, նկատեց, որ 1,5 ժամ է պահանջվել ընդամենը 23 քվեաթերթիկ հաշվելու համար, և հենց այդ ընթացքում էլ տվյալ սենյակ մուտք է գերծել հոգաբարձուների խորհրդի նախագահը։
«ՀՀ կառավարությունը, այս գործը 40 օր իր մոտ ունենալուց հետո, ներքին գրավոր ընթացակարգով հաստատել է ռեկտորի ընտրության արդյունքները։ Իսկ սովորաբար ընտրված ռեկտորին հինգշաբթի օրերին՝ կառավարության նիստի ժամանակ, հրավիրում են, ներկայացնում հանրությանը։ Այս դեպքում նման բան չի եղել»,- ասաց Ղազարյանը։
Արամ Միքայելյանն էլ հավելեց, որ Պոլիտեխնիկի ռեկտորի ընտրության ժամանակ իրականացվել են որոշակի մեքենայություններ։
«Սա ընտրական գործընթացը կեղծելու իմ որակումն է։ Գնացել են ամեն գնով խախտումներ անելու ճանապարհով։ Այս ամոթալի փաստը հանրությունը պետք է իմանա և հասկանա, թե ինչ բարոյահոգեբանական ճղճիմ միջավայր են այնտեղ ստեղծել նախկին ռեկտոր Ոստանիկ Մարուխյանը և նրան փոխարինող, նույն սկզբունքներով ծայրագավառային դատողություններով ապրող Գոռ Վարդանյանը»,- նշեց բանախոսը։
Հիշեցնենք, որ Վերաքննիչ դատարանը մարտի 12-ին բավարարել է Հայաստանի ազգային պոլիտեխնիկական համալսարանի նախկին դասախոս Դավիթ Ղազարյանի բողոքը և անվավեր ճանաչել 2021 թվականի մարտի 1-ին և մարտի 15-ին տեղի ունեցած Պոլիտեխնիկական համալսարանի ռեկտորի ընտրության արդյունքները։
