Ես անձամբ խնդիրներ տեսնում եմ և պետական իրավասու մարմիններին բազմիցս գրավոր և բանավոր ձևաչափով հաղորդակցել եմ տարբեր տեսակի խնդիրներ, լրագրողների հետ ճեպազրույցում այսօր ասաց ՄԻՊ Անահիտ Մանասյանը։
«Հատկապես եթե այս տարվա մասին խոսեմ, դրանք կապված են եղել օրինակ՝ հանրային սննդի, շինարարության օբյեկտների հետ, եթե խոսքը ՄԻՊ մանդատի շրջանակներում ստացված գտեղեկատվության և ձեռնարկված քայլերի մասին է։
Անմիջապես տեղեկատվությունը փոխանցել ենք և հաղորդակցել ենք իրավասու մարմիններին։ Երևի թե տեսել եք՝ այն աստիճանի են տարբեր խնդիրներ հասել, որ ինքս նաև հրապարակային հայտարարություններ եմ արել»,- ասաց Մանասյանը։
ՄԻՊ-ի խոսքով՝ Հայաստանի Հանրապետությունում չպետք է լինեն մարդիկ, որոնք իրենց արտոնյալ կզգան՝ կապ չունի նրանք նախկին, թե ներկա իշխանությունների ներկայացուցիչներ են։ Նաև չպետք է լինեն քաղաքացիներ, որոնք իրենց արժանապատվությունը և իրավունքները հարգված չեն զգում։
Անդրադառնալով կառավարության այսօրվա նիստում Նիկոլ Փաշինյանի՝ ուժային կառույցներից ունեցած դժգոհությանը (Փաշինյանը մասնավորապես հայտարարել էր, թե իր համբերության բաժակը լցվել է, քանի որ իրավապահ համակարգին տրվել է անհրաժեշտ ամեն բան՝ արդյունավետ աշխատանքի համար, բայց ինքն արդյունք այդպես էլ չի տեսնում՝ խմբ.), Մանասյանը նկատեց՝ տարբեր իրավասու մարմինների մոտ պրոֆեսիոնալիզմի լուրջ պակասի տեսնում։
«Դրա առնչությամբ ես անընդհատ խոսել եմ, հիմա էլ եմ խոսում, արձանագրում։ Խնդիրների մի մասը բխում է նրանից, որ շատերն ընդհանրապես չունեն պատշաճ գիտելիքներ և հմտություններ՝ տարատեսակ ոլորտներում։ Պետք է աշխատենք այդ խնդիրների լուծման ուղղությամբ»,- ասաց ՄԻՊ-ը։
