Խազարի շրջանային դատարանը վաղաժամկետ ազատ է արձակել յոթ տարվա ազատազրկման դատապարտված ադրբեջանցի բլոգեր Աթա Աբդուլլաևին։ Դատարանը բավարարել է նրա վաղաժամկետ ազատ արձակման խնդրանքը, հաղորդում են ադրբեջանական լրատվամիջոցները։
Աբդուլլաևին 2021 թվականի մարտին ձերբակալել է Պետական անվտանգության ծառայությունը։ Նրան մեղադրանք է առաջադրվել Ադրբեջանի քրեական օրենսգրքի 182.2.2 հոդվածով՝ շորթում՝ շանտաժի միջոցով։ 2021 թվականի դեկտեմբերի 28-ին դատարանը նրան դատապարտել էր յոթ տարվա ազատազրկման։
Աբդուլլաևը նախկինում արդեն ուներ դատվածություն. 2004 թվականին՝ զինվորական ծառայությունից խուսափելու, իսկ 2014 թվականին՝ գողության համար։
Հիշեցնենք, որ 2019 թվականին Աբդուլլաևը մտել է Հայ Առաքելական եկեղեցու Միլանի Սուրբ Քառասուն մանկանց եկեղեցին, երբ հայ համայնքի ներկայացուցիչները հանդիպում էին Նիկոլ Փաշինյանի հետ, և նրան հարց տվել։
